Ózbekstandaǵy qazaq jazýshylarynyń kitaby jaryq kórdi
Ózbekstan Jazýshylar odaǵynyń ǵımaratynda ótken kitaptyń tusaýkeser saltanatyna osy eldegi belgili qalamgerler, jýrnalıster jáne qazaq-mádenı ortalyǵynyń tóraǵasy jáne músheleri, Ózbekstandaǵy Qazaq ádebıeti keńesiniń tóraǵasy qatysty.
Oqyrmanǵa jol tartqaly otyrǵan 3 týyndy da qazaq-mádenı ortalyǵynyń qarjylandyrýymen jaryq kórgen.
Onyń alǵashqysy – Ózbekstandaǵy belgili qazaq jazýshysy Saparbek Imanbekovtiń «Dostarymyz jyrlaıdy» kitaby. Avtor 4 ulttyń ádebıet jaýharlaryn qazaq tiline aýdarǵan.
«Ózbekstan Jazýshylar odaǵynda jańa týyndylardyń tusaýkeseri ótip jatyr. Men bıyl úlken iske kiristim. Atap aıtqanda, ózbek, orys, qaraqalpaq jáne qyrǵyz tilderinen belgili qalamgerlerdiń óleńin qazaq tiline aýdardym. 44 jyl mektepte jumys istegen adammyn, tıisinshe balalarǵa óte jaqynmyn. Sondyqtan bizdiń qazaq tildi búldirshinderimiz ózge ult ókilderi jazýshylarynyń eńbegimen tanyssyn degen maqsatta osy kitapty shyǵaryp otyrmyn. Buǵan qosa, ulttar arasyndaǵy dostyq nyǵaıa tússin degen oıym boldy», - dedi Saparbek Imanbekov.
Avtor atap ótkendeı, «Dostarymyz jyrlaıdy» týyndysy jastardy otanshyldyqqa, adamgershilikke úndeıdi.
Sonymen qatar tusaýkeseri ótken taǵy bir eńbek – «Qaıran dúnıe». Ol – Ózbekstandaǵy belgili qazaq jazýshysy, 18 kitaptyń avtory Abdýlla Rústemovtiń týyndysy.
«Osy kitapqa jan-dúnıemdi, bútin ómirlik tájirıbemdi salyp jazdym. Onyń ishinde qazaq mektepterinde oqyp jatqan balalarǵa arnap jazǵan tárbıelik sıpattaǵy óleńderim toptastyryldy. Men kóbine ata-ana, Otan, adamgershilik jáne bolashaq týraly oı tolǵadym, aqyl-keńesimdi qostym. Ózimniń bar bilgen-kórgenimdi óleń arqyly jastarǵa mura etkim keldi», - dep toqtaldy Abdýlla Rústemov.
Onyń aıtýynsha, búginde úkimet jáne Ózbekstandaǵy qazaq-mádenı ortalyǵy tarapynan baspa salasyna qoldaý artqan.
«Qazaq-mádenı ortalyǵy keıingi 7-8 jylda 40-tan astam kitaptyń jaryq kórýine járdemdesti. Mundaı buryn-sondy bolmaǵan. Osyndaı ilkimdi ister jalǵasady degen senim mol», - dep túıindedi Abdýlla Rústemov.
Buǵan qosa, jýrnalıst, telejúrgizýshi Rahıla Mansurovanyń 80 jas mereıtoıyna oraılastyrylǵan «Órleý» atty kitabynyń tusaýkeseri ótti.
Qazaq-mádenı ortalyǵynyń tóraǵasy Serikbaı Úsenov atap ótkendeı, atalǵan eńbekterdiń barlyǵy Ózbekstannyń túpkir-túpkirindegi qazaq mektepterine taratylmaq.
Eske sala ketsek, bıyl Ózbekstanda birqatar qazaq jazýshycynyń mereıtoıy atalyp ótedi.