Ózbekstanda jyl basynan beri 250 ret jer silkindi

ASTANA. QazAqparat - 2023 jyldyń basynan bastap Ózbekstanda jáne kórshi elderdiń shekaralas aýmaqtarynda 2,8-den 6,8-ge deıingi magnıtýdaly 250-den astam jer silkinisi tirkeldi, dep habarlaıdy QazAqparat Kabar agenttigine silteme jasap.

Bul týraly Ózbekstan TJM seısmologııalyq boljaý monıtorıngi respýblıkalyq ortalyǵynyń ókilderi málim etken.

Mamandardyń aıtýynsha, jer silkinisiniń jıi bolýy Ózbekstan úshin tabıǵı qubylys sanalady, óıtkeni ol geografııalyq jaǵynan Jerorta teńizi-Azııa seısmıkalyq beldeýinde ornalasqan.

1900 jyldan bastap qazirgi ýaqytqa deıin Ózbekstan aýmaǵynda magnıtýdasy 5-ten asatyn 60-tan astam kúshti jáne joıqyn jer silkinisi boldy.

Keıingi 10 jylda kúshi 6-8 baldyq 6 jer silkinisi tirkelip, 16 adam qaza tapty, 64 adam zardap shekti, 84 mlrd som ekonomıkalyq zalal kelgen.

2011 jyldyń 20 shildesinde epıortalyǵy Qyrǵyzstanda bolǵan 6,5-7 baldyq jer silkinisinde 13 adam qaıtys boldy. Sol kezde Ferǵana oblysynyń keıbir eldi mekenderindegi eski turǵyn úıler qıraǵan edi.

21 jáne 23 naýryzda Ózbekstan turǵyndary oshaǵy Aýǵanstan men Tájikstanda bolǵan jer silkinisterin sezindi. Tashkentte olardyń kúshi 5 ball boldy.