Ózbekstanda jyl saıyn óndiriletin altynnyń tek 6 paıyzy óńdeledi – Shavkat Mırzıeev

<p>TAShKENT. KAZINFORM &ndash; Ózbekstanda jyl saıyn 100 tonna altyn óndiriledi, biraq onyń tek 6%-y ǵana óńdeledi. Muny Namanǵan oblysynda ornalasqan &laquo;Gavhar grýp&raquo; kásipornynyń jumysymen tanysqan Ózbekstan prezıdenti Shavkat Mırzıeev aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń Tashkenttegi menshikti tilshisi Álıhan Asqar.</p>

Ózbekstan basshynyń baspasóz qyzmetinen málim etkendeı, Shavkat Mırzıeevtiń tapsyrmasy negizinde aldaǵy ýaqytta altyn óndirý jáne ony óńdeý isine memleket tarapynan kórsetiletin qoldaý arta túsedi.

«Bizdiń elimizde jyl saıyn 100 tonna altyn óndiriledi. Ony kásipkerlerge bólip tóleý shartymen satýǵa ruqsat etiledi. Shyn aıtqanda, mundaı múmkindik eshqandaı elde joq. Degenmen bizde altynnyń 6 paıyzy ǵana óńdeledi. Altyn óndirmeıtin elderdiń ózi bizge qaraǵanda zergerlik buıymdardy kóbirek eksporttaıdy. Biz bul salada birshama artta qaldyq. Sondyqtan óndiris úshin qosymsha jaǵdaı jasaımyz», - dedi Shavkat Mırzıeev «Gavhar grýp» kásipornynyń qyzmetkerlerimen kezdesý barysynda.

Sonymen qatar Ózbekstan prezıdenti kásipkerlermen pikir almasyp, atalǵan salaǵa qoldaý jasaý úshin zańnamalyq bazany jetildirý máselelerin talqylady.

Qosa ketsek, jyl basynan beri Ózbekstannyń altyn valıýta rezervteri 2,37 mlrd dollarǵa qysqardy. 1 naýryzdaǵy jaǵdaı boıynsha, resmı rezervtik aktıvter 34,56 mlrd dollardan 32,19 mlrd dollarǵa deıin kemigen.

Sondaı-aq, 2023 jyldyń qorytyndysy boıynsha Ózbekstannyń altyn valıýta rezervteri 1,2 mlrd dollarǵa kemip, eldegi qymbat metaldyń kólemi shamamen 24,8 tonnaǵa azaıǵan bolatyn.

Jalpy byltyr qazan jáne qarasha aılarynda Ózbekstan altyndy kóp satqan elderdiń kóshin bastaǵan edi.