Ózbekstanda jibek jip qosylǵan banknottar shyǵarylady

TAShKENT. QazAqparat – Ózbekstan álemde alǵash bolyp banknottar men baǵaly qaǵazdarǵa tabıǵı jibek talshyqtaryn qosyp shyǵarý tehnologııasyn jasap shyǵardy. Mundaı qaǵazdardyń qorǵanys qabileti joǵary bolady, dep habarlaıdy QazAqparat menshikti tilshisi.

Ózbekstan Ortalyq banki baspasóz qyzmetiniń málimetinshe, ádilet mınıstrligi tabıǵı jibek talshyqtary qosylǵan qorǵalǵan qaǵazdy jasaý boıynsha ónertabysqa patent berdi.

Ónertabys «Davlat belgısı» memlekettik ýnıtarlyq kásipornynyń, «Ózbekıpaksanoat» birlestiginiń jáne Tashkent toqyma jáne jeńil ónerkásip ınstıtýtynyń mamandaryna tıesili.

Bul jańashyldyq baǵaly qaǵazdy basqa qaǵaz túrlerinen ajyratýǵa múmkindik beredi. Sebebi onyń qorǵanys elementteriniń quramyna tabıǵı jibek talshyqtary qosylady.

«Óndiris protsesinde tabıǵı jibek talshyqtary qaǵaz massasyna qosylady, sodan keıin ony flýorestsentti eritindimen qanyqtyrady. Ýltrakúlgin sáýlelermen jaryqtandyrylǵan kezde jibek aqýyzy kúsheıtilgen qara túske ıe bolady, osylaısha qaǵazdy jasandy qaǵazdardan aıyrýǵa bolady. Qaǵazǵa birdeı qalyńdyqtaǵy tabıǵı jibekti qosqan kezde onyń beriktigi birneshe ese artady», - dep habarlady Ortalyq banktan.

Jańa tehnologııa banknottar, qorǵalǵan qujattar men qaǵazdar óndirisinde álemdik kóshbasshy bolyp sanalatyn halyqaralyq kompanııalardyń úlken qyzyǵýshylyǵyn týdyrdy.