Ózbekstanda úndi dárisinen ýlanǵan taǵy bir sábı jansaqtaý bólimine tústi

FERǴANA. QazAqparat – Ferǵana oblysynda «Dok-1 Maks» dárisinen ýlaný jaǵdaıy anyqtaldy, dep habarlaıdy QazAqparat Ózbekstan ulttyq aqparat agenttigine silteme jasap.

Ferǵana oblysy densaýlyq saqtaý basqarmasynyń baspasóz qyzmetinen habarlaǵandaı, 2022 jylǵy 28 jeltoqsanda saǵat 12:35-te respýblıkalyq jedel medıtsınalyq kómek ǵylymı ortalyǵy Ferǵanadaǵy fılıalynyń balalar jansaqtaý bólimine úsh jasar bala – Kývasaı qalasynyń 2019 jylǵy turǵyny tústi. Oǵan «Dok-1 Maks» sıropyn iship ýlandy» degen dıagnoz qoıyldy. Búldirshinniń jaǵdaıy aýyr.

Sýyq tıgen balany úıde emdeý kezinde shamadan tys mólsherde «Dok-1 Maks» sıropy berilgeni anyqtaldy. Búldirshinge budan basqa taǵy birneshe preparat berilgen.

Naýqastyń aýrýy jótelden bastalǵan. Balanyń anasy dárihanadan dárigerdiń nusqaýynsyz «Dok-1 Maks» sıropyn satyp alyp, 4 táýlik boıy kúnine 10 ret 5 ml-den berip otyrǵan.

Qazir balanyń jaǵdaıy aýyr. Ony bekitilgen standartqa sáıkes emdep jatyr.

Buǵan deıin habarlaǵanymyzdaı, 22 jeltoqsan kúni Ózbekstanda balalardyń ólimine sebep bolýy múmkin degen negizben tumaý men sýyq tııýge qarsy úndilik «Dok-1 Maks» preparatyn satýǵa ýaqytsha tyıym salyndy.

27 jeltoqsanda ÓR Densaýlyq saqtaý mınıstrligi 18 balanyń ólimi «Dok-1 Maks» preparatynan bolǵanyn rastady. Memlekettik saraptama jáne standarttaý ortalyǵy preparat talapqa saı kelmeıdi degen qorytyndy shyǵardy.

Ózbekstannyń Memlekettik qaýipsizdik qyzmeti (MQQ) 18 balanyń tumaýǵa qarsy úndi dárisinen keıin kóz jumý oqıǵasyna qatysty qylmystyq is qozǵady.

29 jeltoqsanda «Dok-1 Maks» preparatyn ishken taǵy bir bala qaıtys bolǵany belgili boldy.