Ózbekstanda «Spýtnık V» vaktsınasynyń 2 mln dozasyn óndirý josparlanyp otyr

TAShKENT. QazAqparat – Ózbekstanda birinshi kezeńde «Spýtnık V» vaktsınasynyń 2 mln dozasyn óndirý josparlanyp otyr. Bul týrady jýrnalısterdiń suraqtaryna jaýap bergen Ózbekstan Prezıdentiniń baspasóz hatshysy Sherzod Asadov brıfıngide aıtty, dep habarlaıdy QazAqparat menshikti tilshisi.

Ol halyqty jappaı vaktsınalaý úshin qajetti jaǵdaılar men múmkindikterdi jasaýǵa arnalǵan sharalar aıasynda respýblıka basshysy Almalyq qalasynda ornalasqan reseılik vaktsınanyń birinshi dozasyn shyǵarǵan Jurabek Laboratories fabrıkasyna barǵanyn atap ótti.

Jurabek Laboratories zaýytynda jasalǵan jabdyqtar men jaǵdaılar aıyna 10 mıllıon doza vaktsına shyǵarýǵa múmkindik beredi, biraq reseılik seriktestermen olar birinshi kezeńde preparattyń 2 mln dozasyn óndirýge kelisti. Aldaǵy ýaqytta osy kólemdi ulǵaıtý týraly kelissóz júrgiziledi», - dedi spıker.

Onyń aıtýynsha, jobany qarjylandyrý máselesi ózekti emes, reseılik seriktestermen kelissóz áli bitpegen.

«Ózbekstan men Reseı arasyndaǵy strategııalyq seriktestik deńgeıin eskersek, qarjylandyrý asa ózekti emes. Eń bastysy, prezıdent birneshe márte aıtqandaı, halyq belsendi túrde vaktsınalanýy úshin bul jobany tezirek bastaý kerek. Basty maqsat – halyqtyń densaýlyǵy», - dedi Sh.Asadov.

Eske sala keteıik, shilde aıynyń sońynda Ózbekstanda «Spýtnık V» vaktsınasynyń birinshi partııasy quıylyp, ol sapany baqylaýdy tekserý úshin Reseıge jiberilgen bolatyn. Birinshi kezeńde vaktsına reseılik shıkizattan jasalady, sodan keıin osy preparatty óndirýdiń tolyq tsıklin qurý josparlanýda.

Avtory Mádıbek Jánibekov