Ózbekstanda sottalǵan Qazaqstan azamattary elge qaıtarylady

ASTANA. QazAqparat – Májilistiń jalpy otyrysynda «Qazaqstan men Ózbekstan arasyndaǵy bas bostandyǵynan aıyrýǵa sottalǵan adamdardy jazasyn odan ári óteý úshin berý týraly shartty ratıfıkatsııalaý týraly» Zańy qabyldandy, dep habarlaıdy QazAqparat tilshisi.

«Bul shart elimizdiń Konstıtýtsııasynda bekitilgen talaptardy júzege asyrýǵa baǵyttalǵan. Elimizden tys aýmaqta júrgen azamattardy qorǵaýǵa jáne olarǵa qamqorlyq jasaýǵa kepildik berilgen. Eki eldiń arasyndaǵy shart atalǵan normalardy iske asyrýǵa baǵyttalǵan. Osy mándegi norma Ózbekstan Konstıtýtsııasynda da bar. Bul kelisim eki eldiń bir-birine degen seniminiń belgisi. Atalǵan qujatqa qol qoıý úshin birneshe jyl kelissóz júrgizildi. Shartqa qol qoımas buryn eki el arasyndaǵy mıgratsııalyq protsess jáne qylmystyq ahýal zerdelendi», - dedi QR Bas prokýrorynyń orynbasary Áset Shyndalıev.

Osy oraıda ol bul sharttyń áleýmettik mańyzy bar ekenin aıtty.

«Otbasy múshelerimen, jaqyndarymen kezdesip tursa, sottalǵan adamǵa oń yqpal etetini sózsiz. Sottalǵandardy túzetý maqsaty tek qana ony jazalaý emes, sonymen birge tárbıelik yqpal etý, áleýmettik baılanystardy saqtaý. Shart erejesine toqtalsaq, sottalǵan adamdy berý úshin, eń aldymen, onyń kelisimi qajet. Ol jazasyn óz elinde óteıtini týraly ótinish berýi tıis. Qazir bizde sottalǵan 225 Ózbekstan azamaty óz elinde jazasyn óteý týraly ótinish bildirip otyr. ıAǵnı osy másele boıynsha sottalǵandar arasynda arnaıy saýalnama júrgizgenbiz», - dedi Bas prokýrordyń orynbasary.

Sonymen qatar ol Ózbekstanda sottalǵan Qazaqstannyń 20 azamaty bar ekenin aıtty.

«21 memleketpen osyndaı shartty bekittik. Qujat bıýdjetten qosymsha qarajat talap etpeıdi. Ony júzege asyrý ekonomıkalyq, áleýmettik jáne quqyqtyq teris saldarǵa ákep soqpaıdy», - dedi Á. Shyndalıev.