Ózbekstanda Senat depýtattarynyń sany 100-den 65-ke deıin qysqarady

<p>TAShKENT. KAZINFORM — Ózbekstan Olıı Májilisiniń Senaty Parlament palatalarynyń ókilettikterin eldiń jańartylǵan Konstıtýtsııasyna sáıkes ózgertýge baǵyttalǵan zańnamany maquldady, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń Ózbekstandaǵy menshikti tilshisi Álıhan Asqar. </p>

Ózbekstan Senatynyń baspasóz qyzmetinen málimdegendeı, parlament palatalarynyń bir-birin qaıtalaıtyn ókilettikteri naqtylandy.

Endi senatorlardyń jalpy sany 100-den 65-ke deıin qysqarady.

Bul rette árbir ákimshilik aýmaqtan 4 senatordan saılanady, al qalǵan 9 depýtatty prezıdent taǵaıyndaıdy.

Sondaı-aq, zań shyǵarý palatasy spıkeriniń orynbasarlary 7-den 2-ge deıin qysqarady.

Bul rette olar óz mindetin atqarý kezeńinde fraktsııa quramynda bolmaıdy jáne saıası partııaǵa músheligin toqtata turady.

Buǵan qosa zań shyǵarý palatasy men Senatqa ózin-ózi taratý ókilettigi beriledi.

Bul jaǵdaıda zań shyǵarý palatasyndaǵy jańa saılaý 2 aı aralyǵynda, al Senattyń jańa quramy bir aı ishinde jasaqtalýy tıis.

«Senattyń quramy men komıtetterdiń ataýlaryn, sondaı-aq zań shyǵarý palatasy spıkeri orynbasarlarynyń sany men mártebesin aıqyndaıtyn zańnyń erejelerin 2024 jyly, kezekti shaqyrylymdaǵy Olıı Májilisi palatalarynyń qyzmeti bastalǵan kezde iske asyrý josparlanyp otyr», — dep málim etti Senattyń baspasóz qyzmeti.