Ózbekstanda parlament saılaýy aralas júıe negizinde ótedi

<p>TAShKENT. KAZINFORM &ndash; Ár saılaý júıesin zerdeleý arqyly biz ózimizge qolaılysyn izdeý ústindemiz. Ózbekstanda engizilgen proportsıonaldy-majorıtarlyq saılaý modeline qatysty pikir bildirgen belgili ózbekstandyq saıasattanýshy, &laquo;Bilim kerýeni&raquo; memlekettik emes ǵylymı bilim berý mekemesiniń dırektory Farhod Tolıpov osylaı málim etti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.</p>

Byltyr qarashada Ózbekstan Olıı Májilisiniń Senaty elde saılaý men referendým ótkizý tártibin odan ári jetildirýge baǵyttalǵan zań jobasyn maquldady. Oǵan saı, parlamenttiń tómengi palatasyna saılaý aralas (majorıtarlyq, proportsıonaldy) júıe negizinde ótkiziledi.

«Ár júıeniń utymdy jáne osal tustary bolady. Qazir Ortalyq Azııa elderi, onyń ishinde Qazaqstan men Ózbekstan saılaý júıesin jetildirý baǵytynda túrli jańashyldyqtardy synap kórip jatyr. Ár mehanızmdi zerdeleý arqyly biz ózimizge qolaılysyn izdeý ústindemiz. Bul aldaǵy ýaqytta Olıı Májilistiń ókiletti bolýyna yqpal etedi. Engizilip otyrǵan jańa saılaý júıesiniń utymdy nemese tıimsiz bolatynyn bolashaq kórsetedi», - dedi Farhod Tolıpov.

Foto: Álıhan Asqar/Kazinform

Endi zań shyǵarý palatasynyń 75 depýtaty majorıtarlyq saılaý júıesi boıynsha bir mandatty okrýgterden, al qalǵan 75 depýtat proportsıonaldy saılaý júıesi (partııalyq tizim) boıynsha saılanady. 

Buǵan deıin Ózbekstanda parlament saılaýy proportsıonaldy júıemen ótip keldi. Onda halyq partııaǵa daýys beretin. Keıin saılaý qorytyndysy boıynsha jınaǵan daýysqa qaraı partııalar parlamentke óz ókilderin usynatyn.

«Bul rette, majorıtarlyq júıe arqyly saıası dodaǵa táýelsiz kandıdattar túse almaıdy. Olar da eldegi 5 partııanyń biriniń múshesi bolýy tıis. Sondyqtan aralas júıe bolǵanymen, barlyq úmitkerler qandaı da bir partııanyń ókili bolatyny anyq», - dep pikir qosty sarapshy.

Farhod Tolıpov sózin túıindeı kele, saıası partııalar arasyndaǵy básekelestik joǵary bolýy kerektigin atap ótti. Onyń oıy mundaı qadamdar eldi ilgeri súıreýge yqpal etedi degenge saıady.

Eske salaıyq, keshe Ózbekstannyń Ortalyq saılaý komıssııasy parlament jáne jergilikti kengash depýtattarynyń saılaýyn 27 qazanda ótkizý týraly sheshim qabyldady. Saılaý naýqany 26 shildede bastaldy.

Qosa ketsek, buǵan deıin kórshi elde parlamenttiń ókilettigin ózgertýdi kózdeıtin zań qabyldanǵan edi.