Ózbekstanda ótken festıvalde sheteldikterge qazaqtyń ulttyq taǵamdary usynyldy
Aýqymdy sharaǵa Ózbekstan aýmaǵynda elshiligi ornalasqan barlyq elder qatysty. Onyń barysynda sheteldikter Ortalyq jáne Ońtústik-Shyǵys Azııa elderi, arab memleketteriniń ulttyq ashanasyndaǵy taǵamdardan dám tatyp, olardyń daıyndalý joldarymen tanysty.
Festıvalde halqymyzdyń ulttyq taǵamdary da usynylyp, olarǵa suranys joǵary boldy.
«Fýd festıval joǵary deńgeıde ótip jatyr. Onyń aıasynda biz salt-dástúrimizdi jáne ulttyq taǵamdarymyzdy tanystyryp, kelýshilerge usyndyq. Et, qýyrdaq, irimshik, jent, qurt, baýyrsaq sııaqty taǵamdarymyzben qatar, kóje jáne shubat sýsyndaryn ákelip otyrmyz. Sonymen qatar áshekeıler de bar, olarǵa jurttyń qyzyǵýshylyǵy zor», - dedi ulttyq taǵamdardy nasıhattap júrgen qazaqstandyq Núrıza Qabylova.
Festıval aıasynda qazaq ashanasynyń taǵamdarynan dám tatqandar onyń biregeıligi men ereksheligin atap ótip, joǵary baǵa berdi.
«Qazaq taǵamdary ózbek ashanasyna óte uqsas keledi. Meniń eń súısinip jeıtin asym – ol et. Tashkenttiń ózinde de qazaqy etti dámdi ázirleıtin oryndar az emes. Jalpy qazaq ashanasyn óte erekshe ári biregeı dep sanaımyn. Óıtkeni, munda kóbine et qoldanylady, onyń ishinde jylqy eti mol bolady», - dep áserimen bólisti festıvalge kelýshilerdiń biri ıÝldýz Azamova.
Aıta keteıik, bul shara aıasynda kelýshilerge usynylatyn taǵamdar tegin emes. Alaıda, qaı dámniń bolsa da baǵasy qoljetimdi. Keıin fýd festıval nátıjesinde túsken barlyq qarajat qaıyrymdylyq qoryna baǵyttalady.
«Kelýshilerdiń kóbi qazaqy et pen qýyrdaq suraıdy. Ózbekstanda jylqy etimen daıyndalatyn taǵamdar óte az. Sondyqtan birinshi kezekte eń jaqsy satylyp jatqan – ol et. Baǵalary qoljetimdi. Máselen, ettiń bir tárelkesi shamamen 1800 teńge», - dep toqtaldy ulttyq taǵamdarymyz usynylǵan pavılonnyń ókili, qazaqstandyq Gaýhar Jumageldınova.
Fýd festıvaldiń sońy sheteldik jáne jergilikti ónerpazdarynyń kontserttik baǵdarlamasyna ulasty.