Ózbekstanda Ortalyq Azııa jolaýshylaryn tasymaldaý máselesi talqylandy

TAShKENT. QazAqparat – Ózbekstan ushaq parkin ulǵaıtpasa, áýe tasymaly naryǵyn Qazaqstanǵa berýi múmkin. Bul týraly Tashkentte Uzbekistan Airports, Aviation & Logistics Forum» (UAALF-2020) halyqaralyq avıatsııalyq forýmda Ózbekstan Respýblıkasynyń vıtse-premeri Azız Abdýhakımov málim etti, dep habarlaıdy QazAqparat menshikti tilshisi.

«Ózbekstannyń halyq sany 34 mln adamdy qurasa, Qazaqstanda tek 18 mln adam turady. Alaıda, Qazaqstanda qazirgi ýaqytta 100-den astam ushaq bar, al bizde – 29. Biz 5 ushaqqa aldyn ala tapsyrys bersek, Qazaqstanda bul kórsetkish 58 ushaqty kórsetip otyr. Osylaısha, taıaý jyldary olarda 160 ushaq bolady, sondyqtan biz muny oılaýymyz kerek. Eger ushaqtar sanyn kóbeıtpesek, naryqty beremiz», - dep atap ótti A.Abdýhakımov.

Forýmnyń taǵy bir spıkeri – Ózbekstan Respýblıkasynyń vıtse-mınıstri jáne eldiń kólik mınıstri qyzmetin qosa atqarýshy Eler Ganıevtiń aıtýynsha, Ózbekstan «Humo Air» jańa áýe kompanııasy úshin ushaqtar satyp alýdy josparlap otyr. Ol Ózbekstan óńirleri arasynda jáne Ortalyq Azııada jolaýshylar tasymaldaýmen aınalysady. Bul áýe kompanııany jabdyqtaý úshin jańa ushaqtardy, sonyń ishinde reseılik jáne brazılııalyq «Sukhoi» jáne tıisinshe «Embraer» ushaqtaryn óndirýshilermen satyp alý boıynsha kelissózder júrgizilýde.

Sonymen qatar, týrızm salasyn damytý jáne bıznes-qyzmet kórsetý úshin «Uzbekistan Helicopters» kompanııasy jetkizýshilermen batys úlgisindegi jańa tikushaqtardy satyp alýdy talqylamaq.