Ózbekstanda Ortalyq Azııa elderiniń alǵashqy art-ekspedıtsııasy júrip jatyr
Mundaı aýqymdaǵy mádenı is-shara Ortalyq Azııada alǵash ret uıymdastyrylyp otyr. Onyń barysynda sýretshiler ejelgi shaharlar men eskertkishterdiń tarıhyn tereńirek tanyp, sonyń negizinde kartınalardy jaryqqa shyǵarýǵa nıetti.
Ekspedıtsııa elder arasyndaǵy mádenı qarym-qatynasty nyǵaıtý maqsatynda ótkizilip otyr. Sapar QR Mańǵystaý oblystyq mádenıet basqarmasynyń «Sheberhanadaǵy bir kún» jobasy aıasynda qolǵa alynǵan.
Buǵan deıin art-ekspedıtsııasy músheleri Hıýa qalasynda bolyp, dástúrli shyǵys sáýlet óneri nysandarynyń qazirgi kórinisin tamashalap, jergilikti áriptesterimen tájirıbe almasqan.
«Jas sýretshilerdi alyp kelip, ekspedıtsııa jasap, ár óńirde tobymyzben plenerde etıýd jazdyq. Sheteldik sýretshilerdiń sheberlik sabaqtaryn kórip, shákirtterimizben qatar, ózimiz de tájirıbe almastyq. Tashkentte Oral Tańsyqbaevtyń mýzeıinde boldyq. Bul biz úshin úlken tájirıbe. Sonymen qatar mundaı is-sharalardy ótkizý Qazaqstan men Ózbekstan arasyndaǵy mádenı qarym-qatynastyń joǵary deńgeıge shyqqanyn aıǵaqtaıdy», - dedi QR Sýretshiler odaǵynyń múshesi Tynyshbek Baltabaev.
Qylqalam sheberleri buǵan deıin Qaraqalpaqstan astanasynda, Buhara jáne Samarqan qalalarynda boldy. Endi ekspedıtsııa Qyrǵyzstanda jalǵasady. Onyń qorytyndysy boıynsha Almatyda kórme ashylady.