Ózbekstanda qyzmetkerlerdi mindetti vaktsınalaý týraly zań jobasy qaralyp jatyr

TAShKENT. QazAqparat – Ózbekstan Respýblıkasy Olıı Majlısiniń zań shyǵarý palatasy jumys isteıtin turǵyndar úshin koronavırýsqa qarsy mindetti vaktsınalaýdyń quqyqtyq negizin bekitetin zań jobasyn birinshi oqylymda maquldady, dep habarlaıdy QazAqparattyń menshikti tilshisi.

Olıı Majlısi zań shyǵarý palatasynyń baspasóz qyzmeti habarlaǵandaı, «Mıllıı tıklanısh» partııasynyń depýtattary jumys berýshilerdiń koronavırýsqa qarsy vaktsınalanbaǵan nemese vaktsınadan negizsiz bas tartqan qyzmetkerlerdi jumysqa jibermeý quqyǵyn zańnamalyq túrde bekitýdi usyndy.

«Osynyń nátıjesinde koronavırýs ınfektsııasynyń jańa tolqynyn boldyrmaý úshin halyqty jappaı vaktsınalaýdy belgileý úshin quqyqtyq baza qosymsha nyǵaıtylyp jatyr. Juqpaly aýrýlardyń taralý qaýpi týyndaǵan jaǵdaıda profılaktıkalyq vaktsınalaýdy engizý týraly qoldanystaǵy zańnamada baıqalǵan qaıshylyqtar joıylady», - dep habarlady vedomstvo.

Osy maqsatta parlamentshiler tıisti zańdarǵa ózgerister men tolyqtyrýlar engizýdi usyndy.

«Qoǵamdyq densaýlyq saqtaý týraly» zańnyń 28-babynda karantın jáne adamdar úshin qaýipti basqa da juqpaly aýrýlar qaýpi bolǵan jaǵdaıda, Ózbekstan Bas memlekettik sanıtarlyq dárigeriniń sheshimimen halyq vaktsınalanýy múmkin. Eńbek kodeksiniń 113-babynda jumys berýshi juqpaly aýrýlardyń taralý qaýpi tóngen jaǵdaıda profılaktıkalyq vaktsınalaýdan bas tartqan jaǵdaıda, qyzmetkerdi jumysqa almaýǵa quqyǵy bar», - delingen.

Eske sala keteıik, 17 shildede Ózbekstannyń koronavırýsqa qarsy is-qımyl jónindegi arnaıy respýblıkalyq komıssııasy saýda, qoǵamdyq tamaqtaný, qyzmet kórsetý jáne bilim berý salalarynda jumys isteıtin 18 jastan asqan azamattardy, sondaı-aq áskerı qyzmetshiler men quqyq qorǵaý organdarynyń qyzmetkerlerin mindetti túrde vaktsınalaý týraly sheshim qabyldady.

Avtory Mádıbek Jánibekov