Ózbekstanda kórshiles elderden ákelingen 50 kelige jýyq esirtki tárkilendi

<p>TAShKENT. KAZINFORM &ndash; Ózbekstannyń Memlekettik qaýipsizdik qyzmeti (MQK) ózge de kúsh qurylymdarymen birlesip, Aýǵanstan, Tájikstan jáne Qyrǵyzstannan Ózbekstanǵa ákelingen 47,2 kg esirtki zatyn tárkiledi, dep habarlaıdy Kazinform agenttiginiń Tashkenttegi menshikti tilshisi Álıhan Asqar.</p>

MQK málimetinshe, Surhandarııa oblysynyń Ýzýn aýdanynda úsh jergilikti turǵyn ustaldy. Olar Tájikstannan 10 keliden astam apıyn men 10 keliden kóp gashıshti kontrabandalyq jolmen tasymaldaýǵa tyrysqan.

Sonymen qatar atalǵan oblystyń taǵy bir turǵyny qolǵa tústi. Onyń buryn esirtki saýdasy úshin sotty bolǵany anyqtaldy. 43 jastaǵy Termezdiń turǵyny aldyn ala jasyrylǵan qoraptan 1 953 g. apıyn men 4 116 g. gashıshti alyp ketip jatqan ýaqytta ustaldy.

Belgili bolǵandaı, esirtki Ózbekstanǵa Aýǵanstannan jetkizilgen. Buǵan qosa, kúdiktimen sybaılas bolǵan Qazaqstan azamaty (1976 jyly týǵan) ustaldy. Ol apıyn men gashıshti ózbekstandyqtan alyp ketpek bolǵan kezde qolǵa tústi.

Munymen birge, Surhandarııa oblysynda taǵy eki azamat ustalyp, olardan jalpy salmaǵy 922 g. apıyn men 8 283 g. gashısh tárkilendi.

Memlekettik qaýipsizdik qyzmetiniń mamandary Ferǵana oblysynda da esirtki tasymaldaǵan, saqtaǵan eki ózbekstandyqty qolǵa túsirdi. Kúdiktilerdi tintý barysynda 1 764 g. apıyn jáne 10 161 g. gashısh tabyldy. Atalǵan faktiler boıynsha qylmystyq is qozǵalyp, kúdiktiler qamaýǵa alyndy.