Ózbekstanda koronavırýs juqtyrý jaǵdaılary kúrt artty

TAShKENT. QazAqparat – Ózbekstanda sońǵy aptada koronavırýs ınfektsııasyn juqtyrý oqıǵalary kúrt artty. Bul týraly «Ózbekstan 24» telearnasyna Ekinshi Zeńgiata mamandandyrylǵan juqpaly aýrýlar aýrýhanasynyń dárigerleri málim etti, dep habarlaıdy QazAqparat tilshisi.

«Naýqastardyń bizge qaralýy eki esege, al aýrýhanaǵa jatqyzylǵandar sany 1,5 esege artqanyn baıqap otyrmyz. Bizge kelgen naýqastardyń 13% aýyr jaǵdaıda túsedi jáne reanımatsııalyq emdeýdi talap etedi. Jansaqtaý bólimsheleriniń negizgi kontıngenti – aýrýdy aýyr ótkizetin naýqastar, ıaǵnı 65 jastan joǵary adamdar», - dep málim etti aýrýhana dırektory Donıer Mırazımov.

Bólimshe meńgerýshisi Rano Islamovanyń aıtýynsha, qazirgi kezde reanımatsııa bólimsheleriniń tósek oryndary tolyq.

«Jansaqtaý bólimshelerine túskenderdiń kóbine koronavırýsqa qarsy vaktsına alýyna bolar edi, alaıda olar belgili bir sebeptermen ekpe alýdan bas tartqan. Bizde bólimshelerde otbasymen jatqandar bar. Jeti adamnan turatyn otbasy bar. Qazirgi kezde respýblıkamyzda indet órship tur. Naýqastar sany óte kóp. Bólimshede 80 tósek oryn jabdyqtalǵan. Olardyń eshbiri bos emes», - dedi dáriger.

Ózbekstannyń Densaýlyq saqtaý mınıstrliginiń derekterine sáıkes, elde sońǵy aptada aýrýdyń turaqty ósýi baıqalady. Ótken táýliktiń ózinde 427 adam koronavırýs juqtyrǵan. Tashkent (163) jáne Tashkent oblysy (61) kósh bastap tur. Aýrýhanalarda koronavırýs juqtyrǵan 3 571 naýqas jatyr.

Avtory: Mádıbek Jánibekov