Ózbekstanda konstıtýtsııalyq referendým bastaldy
OSK málimeti boıynsha, referendýmǵa 19,7 mln-nan astam adam qatysa alady. Ol úshin aımaqtyq 14 saılaý komıssııasy jasaqtalyp, 10 758 ýchaske uıymdastyrylǵan. Daýys berý kúni mekenjaıynda bola almaıtyn azamattar merziminen buryn 19 sáýirden 26 sáýirge deıin daýys berý múmkindigi bar.
Sheteldegi Ózbekstan azamattary jańa konstıtýtsııaǵa 39 elde daýys bere alady. Onda elshilik pen dıplomatııalyq mıssııalar janynda 55 statsıonarlyq ýchaske uıymdastyryldy.
Ózbekstannyń qazirgi konstıtýtsııasy 1992 jyly qabyldandy, osy aralyqta eldiń negizgi zańyna 15 ret ózgeris engizildi. Jańa redaktsııada konstıtýtsııa baptarynyń sany 128-den 155-ke, normalar – 275-ten 434-ke artty. Nátıjesinde negizgi zań mátini 65%-ǵa jańarady, sol sebepti túzetý engizý emes, respýblıkanyń jańa konstıtýtsııasy týraly zańdy qabyldaý referendýmyn ótkizý usynyldy.
Zańnamaǵa sáıkes, referendýmǵa kelý shegi saılaýshylar tizimine engenderdiń jartysynan kóp bolýy kerek. Daýys berýge qatysqan azamattardyń jartysynan kóbi ony qoldasa referendým qabyldanǵan bolyp sanalady. Referendýmnyń aldyn ala nátıjesin OSK 1 mamyrda jarııalaıdy. Referendýmnyń resmı nátıjesin Ózbekstannyń OSK daýys berý ótkennen keıin 10 kúnnen keshiktirmeı jarııalaıdy.
Buǵan deıin 2022 jyldyń mamyrynda Ózbekstannyń saıası partııalary el Konstıtýtsııasyn jetildirý protsesin bastaǵany habarlanǵan. Qoǵamdyq talqylaý aıaqtalǵan soń bıyl naýryzda Ózbekstan parlamenti referendým 30 sáýirde ótedi dep bekitti.