Ózbekstanda qolma-qol aqsha tapshylyǵy tirkeldi

TAShKENT. QazAqparat - Ózbekstandyqtar dollardy somǵa aýystyra bastady. Ózbekstannyń Ortalyq banki áleýmettik jelilerde taraǵan eldegi bankomattarda qolma-qol aqshanyń jetispeýshiligi týraly habarlamalarǵa túsinikteme berdi, dep habarlaıdy QazAqparat menshikti tilshisi.

Ózbekstan bankiniń málimetinshe, naýryz aıynyń ekinshi jartysynan bastap maýsymdyq ekonomıkalyq belsendiliktiń ósýine baılanysty halyq arasynda qolma-qol aqshaǵa degen suranys joǵary boldy. Naýryzdyń ekinshi jartysynda ǵana ortalyq bank qosymsha aınalymǵa 1,12 trln somdy, al sáýirde 6,34 trln somdy engizdi. Mamyrdyń sońǵy 11 kúninde qosymsha 1,11 trln som shyǵaryldy.

Qazirgi ýaqytta Ózbekstandaǵy bankomattardaǵy qolma-qol aqsha tapshylyǵy baıqalǵan.
«Jalpy naýryz jáne sáýir aılarynda qosymsha 8 trıllıon som berildi. Bul negizinen shetel valıýtasyn ulttyq valıýtaǵa aıyrbastalýynyń kúrt ósýine baılanysty boldy. Eki aıda bul qajettilik ádettegi 11 trıllıon somnan 19,3 trıllıon somǵa ósti. Sondaı-aq plastıkalyq kartalardan 4-4,5 trıllıon som (17 trıllıon sýmnan 22 trıllıon sýmǵa deıin) qolma-qol aqsha alyndy», - delingen ózbekstandyq banktiń resmı habarlamasynda.