Ózbekstanda kólikterdiń terezesin «qarańǵylaýǵa» ruqsat berildi

ASTANA. QazAqparat - Ózbekstanda 2018 jylǵy 1 tamyzdan bastap aqyly túrde kólikterdiń terezesin qarańǵylaýǵa ruqsat etildi, dep habarlaıdy «QazAqparat» ÓzA-ǵa silteme jasap.

Ózbekstan úkimeti terezesine "tonırovka" jasalǵan jeńil kólikterdi paıdalanýdy retteý sharalary týraly qaýly qabyldady. Oǵan sáıkes, 2018 jylǵy 1 tamyzdan bastap «qarańǵy terezemen» júrýge ruqsat beriledi.

Kólikterdiń terezesine tonırovka jasaý qyzmetin Іshki ister mınıstrliginiń janyndaǵy «Innovatsııalyq jobalar jáne turǵyndarǵa servıs qyzmetterin kórsetý» memlekettik ýnıtarlyq kásiporny usynady. Qyzmet aqyly.

Ol úshin Memlekettik jol qozǵalysy qaýipsizdigi qyzmetiniń 1 jylǵa beriletin ruqsat qaǵazyn alý qajet. Artqy terezeni 95 protsentke deıin, al artqy esikterdiń terezelerin 30 protsentke deıin tonırovka jasaýǵa bolady.

Tonırovka jasalǵan sheteldik kólikterdiń ıelerinen Ózbekstanǵa kirýi úshin endi 15 AQSh dollary mólsherinde alym alynady.

Ózbekstandyq jeke tulǵalar kóliginiń terezesin «qarańǵylaý» úshin eń tómengi jalaqynyń 90 esesi (16 587 000 sým), zańdy tulǵalar 120 ese, al sheteldik zańdy tulǵalar 140 ese mólsherinde aqy tóleıdi.

Aıta keteıik, Ózbekstanda 2018 jylǵy 15 shildeden bastap eń tómengi jalaqy 184 300 sým dep belgilengen.