Ózbekstanda qylmys jasaǵan adam Stepnogorsk qalasynda 10 jyl boıy jasyrynyp júrgen

<p>ASTANA. KAZINFORM &ndash; Stepnogorsk qalasynda 10 jyldan astam ýaqyt memleketaralyq izdeýde bolǵan qylmysker ustaldy.</p>

Aqmola oblysy polıtsııa departamenti baspasóz qyzmetiniń málimetine súıensek, Ózbekstan Respýblıkasy Navoı oblysy ishki ister basqarmasy memleketaralyq izdeý jarııalaǵan qylmysker Stepnogorsk qalasynda ustaldy.

- Jedel ýákilderdiń aıtýynsha, er adam 2014 jyldan beri Qazaqstanda jasyrynyp júrgen. Resmı túrde esh jerde jumys istemegen, - delingen aqparatta.

Stepnogorskide otbasyn quryp, osy ýaqytqa deıin qara jumys istegen. Qazir ol Stepnogorsk qalalyq polıtsııa basqarmasynyń ýaqytsha ustaý ızolıatoryna qamaýǵa alyndy. Polıtseıler tergeý amaldaryn júrgizip jatyr.

- Ustalǵan adam kórshi eldiń azamaty bolǵandyqtan ony Ózbekstan Respýblıkasyna ekstradıtsııalaý máselesi qarastyrylýda, - delingen habarlamada.

Osyǵan deıin adam ólimine qatysty qylmysqa kúdikti Reseıden ekstradıtsııalanǵany týraly jazdyq.