Ózbekstanda qaterli isikti 99 paıyz emdeıtin dári jasaldy - feık
Internette «Ózbek ǵalymdary qaterli isik aýrýyn 99 paıyzǵa deıin emdeýge múmkindik beretin jańa dári oılap tapty» degen taqyrypta maqala jarııalanyp, onda 2022 jyldyń maýsymynda Ózbekstanda tirkelip, óndiriske engizilgen jańa radıofarmatsevtıkalyq vektorlyq terapııa quraly týraly aıtylady.
Preparattyń quramy «lıýtetsıı-177» radıoızotopynan jáne oǵan bekitilgen prostata spetsıfıkalyq membranasynyń «antıgen-617» aqýyzdyq zatynan turady delingen.
Ózbekstannyń DSM málimetinshe, bul preparat AQSh, Eýropa jáne Azııa elderinde tek qýyq asty bezi men neıroendokrındik isikterdi dıagnostıkalaý men emdeýde radıofarmatsevtıkalyq dári retinde qoldanylady.
«Sheteldik tájirıbege súıene otyryp, bul quraldy tek qýyq asty bezi obyrynyń 4-shi satysynda súıek metastazdary kezinde ǵana qoldanylady dep aıtýǵa bolady», - deıdi Respýblıkalyq mamandandyrylǵan onkologııa jáne radıologııa ǵylymı-praktıkalyq medıtsına ortalyǵynyń bas dárigeri, medıtsına ǵylymdarynyń doktory Danıer Nıshonov..
Onyń aıtýynsha, bul dári ýaqytsha em bolyp, naýqastardyń ómirin uzartýǵa múmkindik beredi. Bul preparat Ózbekstannyń bir medıtsınalyq mekemesinde 3 naýqasta ǵana qoldanylǵan, al mamandardyń aıtýynsha, isik oshaqtary (metastazdar) men naýqastardyń aýyrýy aıtarlyqtaı tómendegen.
Sonymen qatar kez kelgen jańa preparattyń tıimdiligi rastalmaı turyp, onyń tıimdiligi týraly ártúrli zertteýler, saraptama júrgizilip, tıisti qorytyndylar jasalýy úshin kóp ýaqyt qajet.
Qazirgi ýaqytta álemde barlyq qaterli isikterdi tolyq emdeıtin ámbebap dári joq, ekendigi aıtylǵan vedomstvo habarynda.