Ózbekstanda qansha qazaq turyp jatyr

NUR-SULTAN. QazAqparat – Ózbekstan Respýblıkasynda 800 myńnan astam qazaq turyp jatyr. Bul týraly Ózbekstan Respýblıkasynyń Qazaqstandaǵy Tótenshe jáne Ókiletti elshisi Saıdıkram Nııazhodjaev málim etti, dep habarlaıdy QazAqparat tilshisi.

«2018 jyly Qazaqstanda Ózbekstan respýblıkasy jyly atalyp ótildi. Aıtýly jyl aıasynda Qazaqstanda túrli baǵyttaǵy 90-nan astam is-shara uıymdastyryldy. Sáıkesinshe, 2019 jyly bizdiń elde Qazaqstan jyly atalyp ótildi jáne onyń aıasynda 80-nen astam is-shara ótti. Ekijaqty ótken is-sharalar saıası, aǵartý, mádenı jáne gýmanıtarlyq baǵytty meńzedi. Ókinishke qaraı, 2020 jyly pandemııaǵa baılanysty ekijaqty is-sharalardy toqtata turýǵa týra keldi. Degenmen eki el arasyndaǵy ózara baılanys toqtaǵan emes», - dedi Saıdıkram Nııazhodjaev elordadaǵy Ózbekstan elshiliginde ótken baspasóz máslıhatynda.

Odan bólek, elshi Ózbekstandaǵy qandastardyń taǵdyry týraly aıtty.

«Qazirgi tańda Ózbekstanda 822 myń qazaq ómir súrip jatyr. Olar Ózbekstan eliniń damýyna óz úlesin qosýda. Bizdiń elde 400-deı mektep qazaq tilinde bilim berip jatyr. Sonymen qatar, Ózbekstannyń 7 joǵary oqý ornynda gýmanıtarlyq jáne tehnıkalyq mamandyqtar qazaq tilinde úıretilip jatyr. 1992 jyldan beri Ózbekstannyń 30 oblys ortalyǵynda qazaq mádenı ortalyǵy jumys istep tur», - deıdi ol.

Buǵan deıin, Saıdıkram Nııazhodjaev bıylǵy 6 aı ishinde Qazaqstan men Ózbekstan eli arasyndaǵy taýar aınalymy 1,9 mlrd AQSh dollarǵa jetkenin málim etti.

Odan bólek, Ózbekstan elshisi eki el aýmaǵynda birlesken farmatsevtıka ónerkásibin ashý josparlanyp jatqanyn aıtty.