Ózbekstanda IT kompanııalarǵa bos turǵan ǵımarattardan tegin oryn berilmek

<p>Keler jyly Ózbekstan IT-qyzmetterdiń kólemin - 20 trln sým (1,6 mlrd dollar), al onyń eksportyn 800 mln dollarǵa deıin ulǵaıtady. Respýblıkadaǵy tsıfrlandyrý máseleleri talqylanǵan keńeste prezıdent Shavkat Mırzıeev jaýapty organdarǵa osyndaı mindet júktedi, dep habarlaıdy <a href="Kazinform." target="_blank" rel="noopener">Kazinform</a> agenttiginiń menshikti tilshisi.&nbsp;</p>

Ózbekstan basshysynyń baspasóz qyzmetinen málim etkendeı, keńeste mınıstrlikter men túrli salalardaǵy tsıfrlandyrýdyń jaı-kúıi talqylanǵan. Bul rette prezıdent Shavkat Mırzıeev ekonomıkadaǵy shyǵyndardy tek tsıfrlandyrý esebinen tómendetýge bolatynyn atap ótti. 

«Tsıfrlandyrýdan bas tartqan basshy - sybaılas jemqorlyqty joıýǵa umtylmaıtyn jetekshi», - dedi Shavkat Mırzıeev. 

Sondaı-aq keńeste Ózbekstan basshysy salany damytý úshin qosymsha jaǵdaı jasaý kerektigine toqtaldy. Oǵan saı, aldaǵy ýaqytta óńirlerde paıdalanylmaı bos turǵan ǵımarattardan IT-kompanııalarǵa 1 jyl merzimge tegin oryn beriledi. Daryndy mamandarǵa kompıýter men jabdyqtar jyldyq bólip tóleý shartymen usynylady. Buǵan qosa quramynda 50-den astam IT-mamany bar kompanııalarǵa jyl boıy jalaqy shyǵyndarynyń 15 paıyzyna deıin ótemaqy tólenbek. 

Aıta keteıik, bıyl Ózbekstanda bilim berý, bank, qarjy, keden, aýyl sharýashylyǵy, geologııa sııaqty salalardy tsıfrlyq transformatsııalaý sheńberinde 100 joba ázirlengen. Munymen qatar 500-den astam jańa IT-kompanııa qurylyp, atalǵan sektorǵa 475 mln dollar tikeleı sheteldik ınvestıtsııa tartyldy. Jyl sońyna deıin salanyń qyzmet kórsetý kólemi 10 trln sýmǵa (808,2 mln dollar) jetedi jáne olardyń eksporty 300 mln dollardan asady dep josparlanǵan. 

Keńes barysynda ınternettiń jyldamdyǵyna qatysty da máseleler qozǵalady. Mysaly, halyqaralyq magıstraldyq avtojoldardyń 20 paıyzy mobıldi ınternetpen qamtylmaǵan. Sondyqtan bul iske sheteldik ınvestorlardy tartý mindeti qoıyldy.