Ózbekstanda bolǵan jarylys dúmpýi Maqtaaral aýdanynda estildi

MAQTAARAL. QazAqparat- Ózbekstanda bolǵan jarylys dúmpýi Maqtaaral aýdanynda estildi, dep habarlaıdy QazAqparat tilshisi.

Aýdanda qurylǵan tótenshe jaǵdaılar komıssııasy shuǵyl túrde Jambyl, Birlik, Iirjar, Eńbekshi aýyldyq okrýgteri men Atakent kenti boıynsha zardap shekken áleýmettik nysandar men turǵyn úılerdiń bar-joǵyn anyqtaý baǵytynda jumystar júrgizýde.

«Búgin, Maqtaaral aýdany ákimi apparatynda jedel shtab otyrysy ótti. Ózbekstan Respýblıkasy tarapynan berilip jatqan aqparat kózderindegi málimetterge sáıkes, qazirgi tańda Maqtaaral aýdanynyń turǵyndaryna qaýip joq»-delingen Túrkistan oblysynyń Óńirlik kommýnıkatsııalar qyzmeti taratqan aqparatta.

Buǵan deıin habarlanǵandaı, túnde Ózbekstannyń Syrdarııadaǵy áskerı qoımasynda jarylys boldy. Jelilerde taraǵan vıdeolar men fotosýretterden jarylys tolqyny ǵımarattardyń terezeleri men qurylystaryn zaqymdaǵanyn baıqaýǵa bolady.

Foto: gazeta.uz