Ózbekstanda bıyl 50 jyl buryn bolǵan qatty aıaz qaıtalandy

TAShKENT. QazAqparat – Ózbekstanda osy jyldyń qańtaryndaǵy qatty aıaz rekordtyq deńgeıge jetti, dep habarlaıdy QazAqparat menshikti tilshisi.

Ózbekstan gıdrometeorologııalyq qyzmetiniń málimetinshe, bıyl ózbekstandyqtar qańtarda jergilikti klımat úshin asa sýyq qysty ótkergen. Ekinshi myńjyldyqtyń basynan beri 2008 jyldyń qańtary ǵana qazirgi qańtardan sál sýyq bolǵan.

Aýa temperatýrasy eldiń keıbir aýdanynda óte qatty tómendegen. Ásirese, Tashkent qalasynda 2008 jyldaǵydan da, tipti sońǵy jarty ǵasyrdaǵy eń tómen deńgeıge jetken.

«Al, Tashkent, Jızaq oblystary men respýblıkanyń ońtústigindegi jekelegen stansalardy baqylaý nátıjeleri boıynsha osy jyldyń qańtar aıynda meteorologııalyq baqylaýdyń barlyq jylynda eń tómengi aýa temperatýrasynyń absolıýtti rekordy tirkeldi», - dep habarlaıdy Ózgıdromet.

Sınoptıkter qańtardyń sońǵy kúnderinde aıazdyń birtindep álsiregenin aıtty. Bul úrdis aqpan aıynyń basynda da jalǵasady. Respýblıka aýmaǵyna Jerorta teńizi aýdandarynan ylǵaldy jáne salystyrmaly túrde jyly aýa yǵysady.

Buǵan deıin habarlaǵanymyzdaı, Ózbekstanda sýyqqa baılanysty oqýshylardyń qysqy demalysy uzartyldy.

Tashkent qalasynda 13 qańtar kúni -19,8 gradýs sýyq tirkeldi. Bul – Ózbekstan astanasyndaǵy keıingi jarty ǵasyrdaǵy eń sýyq temperatýra.