Ózbekstanda aıý zoopark qyzmetkerin mert qyldy

TAShKENT. QazAqparat – Ándijan oblysynda aıý ózin tamaqtandyrýǵa kelgen zoopark qyzmetkerin tistep alǵan. Er adam oqıǵa ornynda qaıtys boldy, dep habarlaıdy QazAqparat Gazeta.uz basylymyna silteme jasap.

Oqıǵa 3 qańtar kúni 16:00 shamasynda bolǵan. Zoopark qyzmetkeri aıýdy tamaqtandyrmaq bolyp, onyń toryna kirgen. Janýar ony bas salyp, moınynan tistep alady. Aýyr jaraqat alǵan er adam oqıǵa ornynda kóz jumdy.

Qojaabat aýdandyq ІІB Tergeý bólimi tergeý júrgizip jatyr. Sot-medıtsınalyq saraptama taǵaıyndaldy.

2018 jyldyń jeltoqsanynda dál osy haıýanattar baǵynda kúzetshige eki arystan shabýyl jasaǵan bolatyn. Zoopark ol kezde áli resmı túrde ashylmaǵan edi.

Foto: www.gazeta.uz