Ózbekstanda aýany lastaıtyn kásiporyndar jumysy toqtatylady

<p>ASTANA. KAZINFORM - Ózbekstan prezıdenti qorshaǵan ortany qorǵaý zańnamasyna qorshaǵan ortany normadan tys lastaıtyn kásiporyndar jumysyn shekteýge nemese toqtatýǵa múmkindik beretin túzetýlerge qol qoıdy.</p>

Ózbekstan prezıdenti Shavkat Mırzıeev 6 aqpanda «Tabıǵatty qorǵaý týraly», «Atmosferalyq aýany qorǵaý týraly» jáne «Qorshaǵan ortany baqylaý týraly» zańdarǵa túzetýler engizýge qatysty qujatqa qol qoıdy.

«Zańnamada bıznes qyzmetin shekteý nemese toqtata turý úshin negiz bolatyn dáıeksiz tujyrymdardyń bolýy memlekettik organdardyń dıskretsııalyq ókilettikteriniń keńdigine baılanysty sybaılas jemqorlyqtyń týyndaýyna ákelýi múmkin», - delingen qujatta.

Endi qorshaǵan ortanyń shekten tys lastanýy saldarynan halyqtyń ómiri men densaýlyǵyna qaýip tóngen jaǵdaıda kásiporyndardyń qyzmetin shekteýge nemese toqtatýǵa bolady.

Atap ótilgendeı, túzetýler Ózbekstandaǵy ekologııalyq jaǵdaıdy jaqsartýǵa kómektesedi.