Ózbekstanda 60 jyldyq tarıhy bar gúlder festıvali bıyl da jalǵasyn tapty
Namanǵan – Ózbekstandaǵy eń kórikti ári ásem qalalardyń biri. Munda bıik bıznes ortalyqtar men záýlim ǵımarattar bolmasa da, shahar jaıqalǵan gúlzar baqpen kómkerilgen. Bul qala jylyna bir ret gúlder festıvalin ótkizip, jer-jerden jınalǵan týrıst pen turǵyndardy kórikti dástúrimen baýraıdy.
Gúlder festıvaliniń dástúrge aınalǵany sonshalyq, ol jalpyhalyqtyq mereke retinde toılanady. Bıyl da eldiń túkpir-túkpirinen jınalǵan jurt qarasy qalyń boldy.
Gúlzar baqtaǵy ár memleketke arnalǵan kompozıtsııa erekshe oryndalǵan. Onyń ishinde Qazaqstanǵa bólingen aýmaq ta bar. Aınalasy jasyl jelekke oranǵan Báıterek monýmentiniń maketi alystan menmundalaıdy.
«Bul gúlderdi egýge 1 aı buryn daıyndaldyq. Ár ósimdiktiń óz kútimi bar. Jerdi daıyndaýǵa da biraz ýaqyt ketedi. Shamamen bas-aıaǵy 2 aıda osyndaı baqty, erekshe kompozıtsııalardy jasap shyǵardyq. Árbiriniń syzbasy aldyn ala tekseristen ótken», - dedi gúlder festıvalin uıymdastyrýshy mekemeniń ókili Athamjon Mırzaev.
Baǵbandar bıylǵy festıval úshin arnaıy 30 mln túp kóshet ekken. Odan bólek, jasyl baqta 60 jyldan astam ýaqyt boıy jaıqalyp ósip turǵan ósimdik túrleri kóp. Taǵy bir erekshelik – dástúrli is-sharany ótkizýge jergilikti qatal klımat esh áser etpeıdi. Qala qonys tepken jerdiń topyraǵy sor bolǵanymen, ortalyǵy gúlzar baǵymen áıgili.
«Biz festıvalge respýblıkalyq jastar uıymynyń atynan kelip, qatysyp otyrmyz. Búgingi is-sharany tamashalap, keremet kóńil-kúıde júrmiz. Ózbekstan ǵana emes, Eýropa jáne Azııa memleketterinen kelgen saıahatshylarmen tanystym», - dep bólisti qala turǵyny Mıshtarııa Abdýmanova.