Ózbekstanda 120-dan astam uıymdasqan qylmystyq top músheleri ustaldy
ІІM-niń Buhara oblystyq basqarmasynan málimdegendeı, óńirde izdeýde júrgen 31 qylmysker quryqtaldy.
Atalǵan shara barysynda adam urlaý men tonaý boıynsha - 1, esirtki jáne psıhotroptyq preparattardyń zańsyz aınalymyna qatysty – 8, zańsyz qarý saqtaý boıynsha – 2 jáne ózge de qylmystardyń 9 faktisi anyqtaldy. Osyǵan baılanysty 5 kúdikti qamaýǵa alynsa, 15 adamǵa basqa da bultartpaý sharalary qoldanylǵan.
Sonymen qatar 98 adammen profılaktıkalyq jumys júrgizilip, aımaqtaǵy krımınogendik jaǵdaıǵa teris áser etken 38 azamat ákimshilik qamaýǵa alyndy.
Samarqand oblysynda arnaıy qyzmet mamandary men quqyq qorǵaý organdary qylmystyq toptyń 47 múshesin ustady. Olardyń altaýyna qatysty qylmystyq is qozǵaldy, al 25-i ákimshilik jaýapqa tartyldy.
Tashkent oblysynda qylmystyq toptarǵa qatysy bar bolýy yqtımal 34 adamnyń qyzmetine shekteý qoıyldy. Onyń ishinde 11 azamattyń ústinen qylmystyq is qozǵaldy, 23 azamat ákimshilik qamaýǵa alyndy. Ustalǵandardan 13 pnevmatıkalyq jáne ańshylyq qarý, oq-dáriler men elektroshokerler, pyshaqtar jáne kastetter tárkilendi.
Sonymen qatar, esirtki zattarynyń zańsyz aınalymyna baılanysty 50-den astam fakti anyqtaldy. 11 keli esirtki jáne 8 703 psıhotroptyq dári tárkilendi. Qylmys jasaǵany úshin izdeýde júrgen, sottan jáne tergeý organdarynan jasyrynǵan 64 adam quryqtaldy.
Sondaı-aq, Andıjan oblysynda qylmystyq toptyń 4 ókili ustaldy, onyń bireýi buryn sottalǵan. Olar turmystyq zorlyq-zombylyqqa, usaq buzaqylyqqa, valıýtalardy zańsyz alýǵa nemese berýge baılanysty qylmystar jasady degen kúdikke ilindi.
Qosa ketsek, buǵan deıin Ózbekstandaǵy uıymdasqan qylmystyq toptardy anyqtaý jáne ustaý boıynsha aýqymdy shara júrip jatqanyn habarlap edik.