Ózbekstan jyl sońyna deıin sheteldik 7 mln týrıstti qabyldamaq

<p>Týrızm ındýstrııasy Ózbekstan ekonomıkasynyń eń jyldam damyp kele jatqan ári perspektıvaly sektorlarynyń birine aınaldy. Bul týraly jyldyń qorytyndysyna arnalǵan brıfıngide Ózbekstan týrızmdi damytý komıtetiniń týrıstik qyzmetterdi ártaraptandyrý jáne ınfraqurylymdy damytý basqarmasynyń basshysy Ibrohım Barnaev málim etti, dep habarlaıdy<a href="https://kaz.inform.kz/" target="_blank" rel="noopener"> Kazinform</a> agenttiginiń menshikti tilshisi.&nbsp;</p>

«Taldaýǵa sáıkes, pandemııadan keıin Ózbekstanda týrıstik aǵynnyń ortasha jyldyq ósimi 20%-dan asty. Bıyl qańtar-qarasha aılarynda elge 6 mln 134 myń sheteldik týrıst keldi. Bul kórsetkish jyl sońyna deıin 7 mıllıonǵa jetedi dep boljanyp otyr. Osy jyldyń 11 aıynda týrıstik qyzmetterdiń eksporty 2 mlrd dollar bolǵan. Bir sheteldiktiń elde bolǵan ýaqytyndaǵy ortasha shyǵyny 326 dollar (2021 jyly 224 dollar). Al 2024 jyly týrıstik qyzmetteri eksportyn 2,5 mlrd dollarǵa jetkizý boıynsha sharalar qabyldanady», - dedi Ibrohım Barnaev.

Spıkerdiń aıtýynsha, ishki týrızmdi damytýǵa baǵyttalǵan «Ózbekstanǵa saıahat» baǵdarlamasy boıynsha bıyl 20 mln týrıst saıahattaıdy dep josparlaǵan. Degenmen 11 aıda bul kórsetkish 20,6 mln-ǵa jetti.

Ol úshin týrızm, mádenıet, sport jáne qolóner baǵytynda jergilikti jáne respýblıkalyq aýqymdaǵy 200-ge jýyq is-shara uıymdastyrylǵan. Bul jergilikti týrıster qatarynyń artýyna yqpal etti.

«Jalpy týrıstik sala boıynsha 1 qarashaǵa deıin jalpy quny 8,1 trln sým (658 mln dollar) bolatyn 448 joba iske asyryldy. Osynyń arqasynda 8 191 jumys orny quryldy. Jyl sońyna deıin 1,4 trln sýmǵa taǵy 60 jobany iske qosý josparlanyp otyr. Jyl basynan beri týrıstik jáne onymen baılanysty salalarda 70 myń jańa jumys orny ashyldy», - dep túıindedi Ibrohım Barnaev.