Ózbekstan jańa konstıtýtsııa qabyldaý úshin 30 sáýirde referendým ótkizedi

TAShKENT. QazAqparat - Ózbekstan Olıı Majlısi zań shyǵarý palatasynyń depýtattary 30 sáýirde respýblıkanyń jańa konstıtýtsııasy boıynsha referendým ótkizý jóninde qaýly qabyldady, dep habarlaıdy QazAqparat tilshisi Ózbekstan Respýblıkasy Parlamentiniń baspasóz qyzmetine silteme jasap.

Búgin Ózbekstan parlamenti tómengi palatasynyń otyrysyna qatysqan 137 depýtattyń 134-i «Ózbekstan Respýblıkasynyń Konstıtýtsııasy týraly» zań jobasy boıynsha 30 sáýirde referendým ótkizý týraly qaýlyǵa daýys berdi.

Sheshim Senattyń bekitýine jiberildi, qujat 14 naýryzda qaralady dep kútilip otyr.

Parlamenttiń joǵarǵy palatasy qujatty maquldasa, ol úsh kún ishinde baspasóz betinde jarııalanady.

Qaýly jobasy bir kún buryn Olıı Majlıs zań shyǵarý palatasynyń kezekti otyrysynda qaraldy.

Otyrys barysynda depýtattar Konstıtýtsııanyń baptarynyń sany qazirgi 128-den 155-ke, normalary 275-ten 434-ke óskenin atap ótti.

Nátıjesinde negizgi zańnyń mátini 65 paıyzǵa jańarady.

Osyǵan baılanysty ózgertý engizý týraly emes, respýblıkanyń jańa konstıtýtsııasy týraly zańdy qabyldaý boıynsha referendým ótkizý usynyldy.

Buǵan deıin habarlanǵandaı, 2022 jyldyń mamyr aıynda Ózbekstannyń jetekshi saıası partııalary Parlament palatalarynyń birlesken otyrysynda el Konstıtýtsııasyn jetildirý protsesin bastaýǵa kelisti.