Ózbekstan xalyqaralyq yqpalyn arttyrýǵa kiristi - shyǵystanýshy

ASTANA. QazAqparat - Shyǵystanýshy Janat Momynqulovtyń oıynsha, búginde Ózbekstan memleketi Qazaqstannyń tájirıbesi negizinde óz ekonomıkasyn naryqtyq ekonomıkaǵa barynsha beıimdeýdi kózdeıdi. Budan bólek, osy eldiń jańa bıligi eldiń xalyqaralyq yqpalyn arttyrýǵa kiristi, dep xabarlaıdy QazAqparat tilshisi.

«Ózbekstan óz ekonomıkasyn lıberaldandyra bastady. Olar naryqtyq ekonomıkanyń zańdylyqtaryna beıimdelýdi qalaıdy. Valıýtalary qunsyzdandy, devalvatsııa boldy. Qazaqstan bunyń bárinen 90-jyldary ótip ketken. Sondyqtan bizdiń tájirıbemiz olar úshin qyzyq bolyp tur. Máselen, biz san alýan ekonomıkalyq reformalarǵa bardyq. Ózbekstan bolsa, áý basta ashyldy da, keıin jabylyp qaldy. Biz birden reformany iske asyrýǵa kirissek, olar birte-birte jasaýdy uıǵardy», - dedi Momynqulov QazAqparat tilshisine bergen suxbatynda.

Sarapshynyń aıtýynsha, Memleket basshysy Nursultan Nazarbaevtyń osy jolǵy sapary barysynda ekijaqty bıznes úshin barynsha jaǵdaı jasaý máselesi de oryndy kóterildi. Sonyń arqasynda ınvestıtsııalardy tartyp, ózara saýda sattyqty arttyrýǵa bolady. Ózbekstan arqyly ekportty da ulǵaıtýǵa múmkindik bar.

«Negizi, qazirgi kezde Ózbekstan memleketine Qazaqstannyń qoldaýy qajet. Sebebi bılik aýysqannan keıin aldymen jaqyn jatqan kórshi elderdiń qoldaýyn izdeıdi. Shavkat Mırzıeev eldiń ishinde qoldaý tapty. Endi, sheteldegi yqpalyn arttyryp jatyr. Óıtkeni xalyqaralyq uıymdarda basqa memleketterdiń qoldaýy qajet. Al Qazaqstan xalyqaralyq saxnada keńinen tanylyp úlgergen», - dep atap kórsetti shyǵystanýshy Momynqulov.