Ózbekstan Túrkııaǵa kómekke 60 qutqarýshy jiberedi

TAShKENT. QazAqparat - Ózbekstan Túrkııaǵa eldiń ońtústik-shyǵysynda bolǵan joıqyn jer silkinisiniń saldaryn joıýǵa shuǵyl kómek kórsetedi, dep habarlaıdy QazAqparat tilshisi Ózbekstan prezıdentiniń baspasóz qyzmetine silteme jasap.

«Prezıdent Shavkat Mırzıeevtiń tapsyrmasy boıynsha Túrkııaǵa jer silkinisinen zardap shekkenderge gýmanıtarlyq kómek jáne tabıǵı apat saldaryn joıýǵa qatysý úshin Tótenshe jaǵdaılar mınıstrliginiń bir top qutqarýshylary jóneltiledi», - dedi baspasóz hatshysy Sherzod Asadov.
Ózbekstan TJM habarlaǵandaı, memleket basshysynyń tapsyrmasy boıynsha gýmanıtarlyq kómek kórsetý jáne jer silkinisi saldaryn joıý úshin TJM-niń 60 qutqarýshysy men arnaıy qutqarý tehnıkasy 3 birligi Túrkııaǵa jóneltilip jatyr.
Eske sala ketsek, 6 aqpan kúni tańerteń Túrkııanyń ońtústik-shyǵysynda magnıtýdasy 7,4 kúshti jer silkinisi boldy. Kóptegen qıraýlar saldarynan adamdar úıindi astynda qaldy, qutqarý jumystary júrgizilýde. Júzdegen adam qaza taýyp, myńdaǵan adam jaraqat aldy.

Foto: aa.com.tr