Ózbekstan Túrki keńesiniń tolyqqandy múshesi boldy - Baǵdad Ámireev
«Túrki Keńesiniń Bas Hatshysy retinde 2019 jyldyń 14 qyrkúıekte Ózbekstan Respýblıkasynyń 2009 jyly Túrkitildes memleketterdiń yntymaqtastyq keńesin (Túrki Keńesi) qurý týraly Nahchyvan kelisimin ratıfıkatsııalaǵanyn úlken qýanyshpen habarlaımyn.
Bul qadammen Ózbekstan Respýblıkasynyń Túrki Keńesiniń tolyqqandy múshesi boldy. Osy tarıhı sheshim Nahchyvan kelisimine qol qoıylýynyń 10 jyldyǵyna jáne 2019 jyly 15 qazanda Bakýde ótetin Túrki Keńesiniń 7-sammıtine tuspa-tus kelip otyr. Aldaǵy Sammıtte Túrkitildes elderiniń basshylary Ózbekstan Respýblıkasynyń Prezıdenti Shavkat Mırzıeev bastaǵan baýyrlas Ózbek elin resmı túrde qurmetpen qarsy alady.
Baýyrlas Ózbekstannyń Túrki Keńesi ujymyna kirýin shyn júrekpen quptaı otyryp, bul aıtýly oqıǵa Túrki Keńesiniń jumysyna jáne túrkitildes elder men halyqtar arasyndaǵy udaıy damyp kele jatqan yntymaqtastyqqa úlken serpin beredi dep sanaımyn.
Ózbekstan árdaıym Túrki áleminiń asa mańyzdy faktorlarynyń biri jáne Uly Jibek jolynyń boıynda ornalasqan Samarqand, Buhara jáne Hıýa sııaqty qalalarymen túrki-ıslam dúnıesynyń ekonomıkalyq jáne mádenı besigi boldy. Sonymen birge, baýyrlas Ózbek halyǵynyń óziniń baı ulttyq jáne tarıhı murasymen álemdik órkenıetke qosqan úlesi zor. Búgingi tańda Ózbekstan tek óziniń baýyrlas elderine ǵana emes, sonymen qatar búkil aımaq úshin de yntymaqtastyq pen damýdyń jańa úrdisin usynyp otyr.
Osy erekshe sátti paıdalana otyryp, baýyrlas Ózbekstandy jańa dáýirge bastaǵan Respýblıka Prezıdenti Shavkat Mırzıeevke úlken qurmetimdi bildirgim keledi. Ózbekstan men basqa da túrkitildes elder arasyndaǵy ǵasyrlar boıǵy myzǵymas tamyrlaryna negizdelgen baýyrlastyq qatynastar Túrki Keńesiniń birtutastyq týy astynda jańa kenestik pen jarqyn bolashaqqa ıe bolatynyna senimdimin», - delingen Túrki keńesiniń Bas hatshysy Baǵdad Ámireevtiń málimdemesinde.
Buǵan deıin QR Syrtqy ister mınıstrligi Ózbekstan Respýblıkasynyń Túrkitildes memleketterdiń yntymaqtastyq keńesine kirýin qoldaıtyny týraly habarlaǵan bolatynbyz.