Ózbekstan TMD-dan qandaı paıda kórip otyr

ASTANA. QazAqparat - Ózbekstan prezıdenti janyndaǵy Aımaqaralyq jáne strategııalyq zertteýler ınstıtýtynyń dırektory Vladımır Norov TMD-nyń tıimdiligi týraly aıtty, dep habarlaıdy QazAqparat tilshisi. 

Onyń aıtýynsha, TMD - óte mańyzdy qurylym. Atalǵan uıym Ózbekstannyń erkin saýda aımaǵy boıynsha ortaq maqsattarǵa jetýine múmkindik berip otyr.

«Biz saýda-ekonomıkalyq baılanysymyzdy retke keltirdik. Ol - bir. Ekinshiden, qaýipsizdik máselesi sheshilip otyr. Sonyń ishinde ekstremızm, terrorızm, esirtki saýdasy jáne taǵy basqa transulttyq qylmystarmen kúres sharalary júrgiziledi. Budan bólek, áskerı-tehnıkalyq salada yntymaqtastyq baılanystarymyz kúsheıip keledi. Sondyqtan, biz «TMD-nyń mańyzdylyǵy álsirep barady» deıtindermen kelispeımiz. Ózbekstan TMD-nyń qurylymdaryna qatysýdy kúsheıte bermek. Ony bizdiń prezıdentimiz Sochı qalasynda ótken sońǵy sammıtte de aıtqan. Sodan beri biz atalǵan uıymnyń on birdeı qurylymyna qosyldyq», - dedi V.Norov QazAqparat tilshisine bergen suhbatynda. 

Sońǵy jıynda Ózbekstan prezıdenti Shavkat Mırzıeev 2020 jylǵy TMD sammıtin óz elinde ótkizýdi usyndy.

«Osyǵan baılanysty kelesi jyldyń sońynda biz sammıtti ótkizý tujyrymdamasyn usynamyz. Sol kezde tóraǵalyq bizge beriledi», - dep atap kórsetti V.Norov. 

Aıta keteıik, erteń, 28 qyrkúıekte Tájikstan astanasy - Dýshanbe qalasynda TMD memleket basshylary keńesiniń kezekti sammıti ótedi. Sol jerde birqatar qujattarǵa qol qoıylady.