Ózbekstan Shardara mańynan AES salsa, Qazaqstanmen aqyldasýy kerek – Ekologııa mınıstri

<p>Úkimet otyrysynan keıin ótken baspasóz konferentsııasynda Ekologııa jáne tabıǵı resýrstar mınıstri Erlan Nysanbaev Ózbekstannyń Sharadara sý qoımasynyń mańyndaǵy kólde atom elektr stansasyn salý jobasy týraly pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.&nbsp;</p>

«Ózbekstan reseılik «Rosatom» kompanııasymen birge Shardara sý qoımasynan jaqyn jerde, Qazaqstan shekarasynyń túbinde AES salý jobasyn qolǵa alyp jatyr. Sol jobany iske asyrý úshin Qazaqstannyń kelisimin aldy ma? Bul jobaǵa sizdiń ekologııaǵa jaýapty mınıstr retindegi pikirińiz qandaı?» - dep surady jýrnalıst.

Mınıstrdiń aıtýynsha, Tashkentten áli resmı saýal túspegen. Biraq kórshiles el retinde Astananyń kelisimin alýǵa mindetti.

«Jalpy atom elektr stansalaryn salý boıynsha olar da ár túrli múmkindikterdi qarastyryp jatyr. Biraq olar resmı túrde mynaý shekaralas memlekettermen mindetti túrde hat joldap, bolmasa muny bizben aqyldasady. Biz de ótkende qarastyrdyq qoı, sol sııaqty naqty sheshim qabyldandy dep aıtýǵa bolmaıdy. Sol sııaqty bizdiń Balqashtyń túbinde AES salý kerek degen sheshim de qabyldanǵan joq. Tipti salyna ma, degen másele tur áli. Ózderińiz bilesizder, qoǵamda bul atom elektr stansasy jóninde túrli pikir týyndap jatyr. Sol sebepti bul másele aıaǵyna deıin sheshilmegen», - dedi mınıstr.

Onyń aıtýynsha, Ózbekstan qarastyryp jatqan nusqalardyń ishinde Syrdarııa boıynan AES salý usynysy da bar.

«Meniń bilýimshe, olar da jan-jaqty qarap jatyr. Sý kerek oǵan. Syrdarııanyń boıynan deıdi, odan-budan deıdi. Biraq naqty sheshim joq. Olar izdenip jatyr. Onyń bárine tıisti mamandar baǵa beredi Ol qandaı elektr stansasy bolady, onyń býyny qandaı bolady, ekinshi me úshinshi me, tórtinshi me... Oǵan jaýap beretin men maman emespin. Sol sebepten mamandar jaýap beredi. Al tehnıkalyq sheshimderi jaǵy bizdiń mınıstrliktiń quzyretinde emes. Tehnıkalyq sheshim qabyldanǵannan keıin ǵana biz olardy ózimizdiń zańǵa sáıkestendirip qaraımyz. Ókinishke qaraı, ázirshe oǵan eshqandaı jaýap bere almaımyz», - degen mınıstr óz pikirin bildirýden tartynyp qaldy.