Ózbekstan prezıdenti Konstıtýtsııa kúnine oraı 483 adamǵa raqymshylyq jasady

<p>TAShKENT. KAZINFORM &ndash; Konstıtýtsııa kúnine oraı Ózbekstan prezıdenti Shavkat Mırzıeev &laquo;Jazasyn ótep jatqan, istegen isine ókinetin jáne ómirin ózgertýge bet alǵan adamdar tobyna raqymshylyq jasaý&raquo; jarlyǵyna qol qoıdy, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform</a> agenttiginiń menshikti tilshisi.</p>

Jarlyqqa saı, 483 adamǵa raqymshylyq jasaldy. Olardyń ishinde 107 sottalǵan negizgi jazasyn óteýden tolyq bosatylsa, 275 adam merziminen buryn shartty túrde bostandyqqa shyǵady. Sonymen qosa, 7 adamnyń jazasy jeńildetilip, bas bostandyǵynan aıyrylǵan 94 azamattyń merzimderi qysqardy.

Raqymshylyq jasalǵandardyń qatarynda shet memleketterdiń 25 azamaty, 32 áıel, 60 jastan asqan 5 er adam, 30 jasqa deıingi 274 adam (onyń ishinde 104 adam kámeletke tolmaǵan), sondaı-aq tyıym salynǵan uıymdardyń qyzmetine qatysqan 6 adam bar.

«Bul - elimizde júrgizilip jatqan gýmanızm saıasatynyń jáne halqymyzdyń meıirimdilik pen janashyrlyq sııaqty asyl qasıetteriniń jarqyn kórinisi», - delingen Ózbekstan basshysynyń baspasóz qyzmeti taratqan habarlamada.

Jarlyqty oryndaý sheńberinde jaýapty vedomstvolarǵa raqymshylyq alǵan adamdardy otbasyna qaıtarý, olardyń qoǵamǵa beıimdelýine járdemdesý jáne jumysqa ornalastyrý jóninde tapsyrmalar berildi.

Eske salaıyq, bıyl sáýirde Oraza aıt qarsańynda Ózbekstan prezıdenti Shavkat Mırzıeev 426 adamǵa raqymshylyq jasaǵan edi.