Ózbekstan parlamentshileri Qazaqstandaǵy keń reformalardy joǵary baǵalaıdy

ASTANA. QazAqparat – Ózbekstan Olıı Majlısi Senatynyń tóraıymy Tanzıla Narbaeva QR Parlamenti Senatynyń tóraǵasy Máýlen Áshimbaevpen kezdesý kezinde Qazaqstan Prezıdenti Qasym-Jomart Toqaevtyń ádiletti Qazaqstandy qurý jolynda júrgizip jatqan aýqymdy reformalarynyń mańyzdylyǵyna toqtaldy. Bul týraly QazAqparat Palatanyń baspasóz qyzmetine silteme jasap habarlaıdy.

Sondaı-aq, Tanzıla Narbaeva Qazaqstan tarabyn iri halyqaralyq is-sharalardy, sonyń ishinde bıylǵy jyldyń qyrkúıek aıynda ótken álemdik jáne dástúrli dinder kóshbasshylarynyń VII Sezin sátti ótkizýimen quttyqtady.

«Qazaqstan álemniń túkpir-túkpirindegi adamdar kelgisi keletin, sonyń ishinde Prezıdentterińizdiń bastamasymen júrgizilip jatqan ózgeristermen tanysýǵa yntaly adamdardyń basyn qosatyn iri halyqaralyq is-sharalardy uıymdastyrýshy jáne ótkizýshi ortalyqqa aınalyp otyr. Qazaqstan Konstıtýtsııasyna búkil eldiń ıgiligine qyzmet etetin mańyzdy ózgerister engize aldy. Biz elderińizde bolyp jatqan ózgeristerdi muqııat qadaǵalap otyrmyz», - dep atap ótti Tanzıla Narbaeva.

Áńgimelesý barysynda Parlamentter palatalarynyń basshylary Qazaqstan men Ózbekstan arasyndaǵy yntymaqtastyq jónindegi komıssııa jumysynyń oń dınamıkasyn atap ótip, onyń eki palatanyń ózara is-qımylyna júıeli sıpat beretinin, atap aıtqanda parlamenttik baqylaý jumysyn kúsheıtýge múmkindik beretinin atap ótti.

«Biz zań shyǵarý jumysynda tájirıbe almasýǵa múddelimiz, sebebi bizdiń elderdegi problemalardy sheshý men jaǵdaıdy baǵdarlaýda kózqarastary uqsas keledi. Tıisti komıtetterdiń, onyń ishinde keńester men máslıhattardyń, jastar men áıelder uıymdarynyń óńirlik yntymaqtastyǵy boıynsha ózara is-qımylyn kúsheıtý mańyzdy», - dep jalǵastyrǵan Tanzıla Narbaeva, 2023 jyly Ózbekstanda Qazaqstannyń kásipker áıelderiniń qatysýymen bıznes-forým ótkizýdi usyndy.

Óz kezeginde Máýlen Áshimbaev Tanzıla Narbaevaǵa parlamentaralyq yntymaqtastyqty qurýdaǵy ashyqtyǵy jáne bastama kótergen jobalary úshin alǵysyn bildirdi.