Ózbekstan Palestınadaǵy soǵysta zardap shekken balalar men áıelderdi beıtarap emdeýge daıyn – Mırzıeev

<p>TAShKENT. KAZINFORM &ndash; Ózbekstan Prezıdenti Shavkat Mırzıeev Palestına máselesi boıynsha kezekten tys arab-ıslam sammıtinde sóz sóıledi. Ózbekstan basshysy Palestınadaǵy qaqtyǵystaǵy soǵys qımyldaryn toqtatý jáne qaýipsiz gýmanıtarlyq dálizdermen qamtamasyz etý BUU-nyń turaqty nazarynda bolýy tıis ekenin jáne Ózbekstan zardap shekken palestınalyq balalar men áıelderdi qabyldaýǵa daıyn ekenin atap ótti. Bul memleket basshysynyń <a href="https://president.uz/uz/lists/view/7686" target="_blank" rel="noopener">baspasóz qyzmeti </a>habarlady.</p>

– Ókinishke oraı, 2023 jyly Er-Rııadta ótken tarıhı kezdesýden keıin bul ádiletsiz jáne qandy soǵystyń aýqymy keńeıdi, – dedi Ózbekstan prezıdenti.

Mırzıeev álemdik qaýymdastyqtyń áreketteri men úndeýlerine qaramastan, halyqaralyq normalar men qararlardy óreskel buzý jalǵasyp jatqanyn basa aıtty. Soǵystyń qazir Lıvan aýmaǵyna jaıylǵany álemdi dúr silkindirgen.

– Eń soraqysy, barlyǵymyz kýá bolyp otyrǵandaı, bul qaıǵyly oqıǵa halyqaralyq arenada eki túrli standart negizinde qarastyrylýda. Al bul soǵystyń keń taralý yqtımaldyǵyn kúrt arttyrady, halyqaralyq qaýipsizdikke eleýli nuqsan keltiredi, – dedi Shavkat Mırzıeev.

Ózbekstan prezıdenti respýblıkanyń «Palestına-Izraıl problemasyn beıbitshilik pen dıplomatııa arqyly sheshýge baǵyttalǵan barlyq praktıkalyq bastamalardy tolyq qoldaıtynyn» atap ótti.

– Osyǵan baılanysty búgingi sammıtimizde ortaq saıası erik-jiger men birlikti kórsetip, jahandyq jáne aımaqtyq deńgeıde tıimdi tetikter men naqty sheshimderdi ázirlep, olardy tez arada júzege asyramyz dep oılaımyz, – dedi ol.

Áńgime, eń aldymen, BUU men Qaýipsizdik Keńesiniń osy kópjyldyq shıelenisti sheshýdegi róli men yqpalyn túbegeıli arttyrý týraly bolyp otyr, dep qosty Prezıdent.

Shavkat Mırzıeev 15 qarashada Palestına halqy óziniń ulttyq merekesin, Palestına memleketiniń jarııalanǵan kúnin toılaıtynyn eske saldy.

– Ejelgi jáne baı tarıhy bar bul halyqtyń 1967 jylǵy shekarasynda astanasy Shyǵys Ierýsalım bolatyn táýelsiz jáne erkin memleket qurýǵa tolyq quqyǵy bar ekenine senimdimin. Osyǵan baılanysty biz Saýd Arabııasynyń bastamasymen qurylǵan eki memleketti sheshim jolyndaǵy jahandyq alıanstyń qyzmetin tolyq maquldaımyz, – dedi Ózbekstan basshysy.

Shavkat Mırzıeev soǵystan zardap shekken palestınalyq balalar men áıelderdi Ózbekstandaǵy emhanalarda tegin emdeýge daıynbyz dedi.

– Biz Palestına halqyna praktıkalyq kómek kórsetý máselelerin kelesi jyly Samarqandta ótetin «Shyǵanaq arab memleketteri – Ortalyq Azııa» sammıtinde talqylaýǵa nıettimiz, – dedi Mırzıeev.

Sonymen qatar, Ózbekstan basshysy Islam Yntymaqtastyq Uıymy aıasynda Quddýsta ál-Aqsa meshiti men basqa da biregeı tarıhı-mádenı eskertkishterdi saqtaýǵa úlken kóńil bólý qajettigin atap ótti.