Ózbekstan Olıı Majlısiniń spıkeri: Elbasy maqalasynda qamtylǵan ıdeıalardyń mańyzy zor

ASTANA. QazAqparat - Ózbekstanda Nursultan Ábishulynyń jeke qasıetteri árqashan da joǵary baǵalanýda. Búgin Astanada QR Tuńǵysh Prezıdenti kúnine arnalǵan halyqaralyq parlamenttik konferentsııada Ózbekstan Olıı Majlısi Zań shyǵarýshy palatasynyń spıkeri Nýrıdjon Ismoılov osylaı aıtty, dep habarlaıdy QazAqparat.

«Táýelsizdik jyldarynda Qazaqstandaǵy eń basty strategııalyq sheshimder Prezıdent Nursultan Nazarbaevtyń tikeleı qatysýymen júzege asyryldy. Búginde Qazaqstandaǵy prezıdenttik bılik óziniń tarıhı mindetin jarqyn úlgide atqara alǵanyn senimdi aıtýǵa bolady. Ózbekstanda Nursultan Ábishulynyń jeke qasıetteri árqashan da joǵary baǵalanýda. Táýelsizdik jyldarynda eki el basshylyǵy arasynda meıirimdi, ashyq ári dostyq qatynastar qalyptasty. Sáıkesinshe, bul baǵyttaǵy qadamdar baýyrlas halyqtardyń baılanysyna ońtaıly yqpal etti», - dep toqtaldy Nýrıdjon Ismoılov.

Sonymen qatar, ol búgin QR Parlamenti Májilisiniń tóraǵasy Nurlan Nyǵmatýlınmen eki el parlamentteri arasyndaǵy qatynastardyń perspektıvasy talqylanǵanyn, osy yntymaqtastyqty tereńdetý aıasynda tıisti memorandýmǵa qol qoıylǵanyn atap ótti. 

«Biz Ózbekstanda Qazaqstan Prezıdentiniń «Uly dalanyń jeti qyry» atty maqalasymen tanysyp shyqtyq. Sonymen qatar, «Rýhanı jańǵyrý» baǵdarlamasy sekildi taıaýda jarııalanǵan maqalada kóterilgen taqyryptar Qazaqstan halqynyń uly bolashaǵyna jol silteıtin tereńnen oılastyrylǵan baǵyttardy qalyptastyrdy. Onda qamtylǵan ıdeıalardyń mańyzdylyǵy zor. Bul eńbekter ulttyq tarıhty túsiný isine mańyzdy tájirıbelik úlesin qosady, sondaı-aq qazaqstandyq qoǵamnyń turaqty damýyndaǵy perspektıvalardy aıqyndaýǵa yqpal etedi», - dedi Nýrıdjon Ismoılov.