Ózbekstan men Reseı tolyqqandy yntymaqtastyqty nyǵaıtýǵa nıetti
Ózbekstan prezıdentiniń baspasóz qyzmeti habarlaǵandaı, kezdesý basynda Shavkat Mırzıeev shaǵyn formatta jan-jaqty strategııalyq áriptestik pen odaqtastyqtyń ekijaqty qatynastarynyń qazirgi jaı-kúıine joǵary baǵa berdi.
Bul saparǵa daıyndyq sheńberinde joǵary deńgeıde birqatar is-sharalar ótkeni, onyń ishinde Úkimet basshylary deńgeıinde birlesken komıssııanyń tórtinshi otyrysy, medıtsınalyq forým, rektorlar men óńirler forýmdary sátti uıymdastyrylǵany atap ótildi. Ónerkásiptik kooperatsııa qarqyndy damyp keledi. Ózbekstanda Reseı ınvestıtsııalarynyń kólemi ósýde.
Prezıdentter óńirler arasyndaǵy ózara is-qımyldy odan ári damytýdyń mańyzdy ekenin málimdedi. 4 qazan kúni Qazan qalasynda ótken Óńiraralyq yntymaqtastyqtyń úshinshi forýmynda 3,5 mlrd dollar bolatyn kelisimder men kelisimsharttarǵa qol qoıylǵan.
Óńirler bólinisinde ónerkásiptik kooperatsııanyń jeke «Jol kartasyn» daıyndaý týraly ýaǵdalastyq ornady. Sondaı-aq, kezdesýde Reseıde eńbek etetin ózbekstandyqtar úshin áleýmettik kepildikterdi qamtamasyz etý máseleleri egjeı-tegjeıli qaraldy.
Bir kún buryn Búkilreseılik kórme ortalyǵynda jańartylǵan Ózbekstan pavılony ashylyp, ondaǵy baı jáne alýan túrli mádenı-gýmanıtarlyq yntymaqtastyqqa joǵary baǵa berildi. Máskeýdegi «Lazgı» ulttyq baletiniń premerasy, ózbek kınosynyń kúnderi, Ózbekstandaǵy «Orys maýsymy» jobasynyń is-sharalary syndy mańyzdy mádenı is-sharalar uıymdastyrylǵan.
Prezıdentter ózara qyzyǵýshylyq týdyratyn óńirlik jáne halyqaralyq kún tártibi máselelerin talqylaǵan. Kelissózder qorytyndysy boıynsha Reseı men Ózbekstan kóshbasshylary jan-jaqty strategııalyq seriktestik pen odaqtastyq qatynastaryn tereńdetý týraly birlesken málimdeme qabyldady.
Eki el prezıdentteriniń qatysýymen olardyń úkimetteri men mınıstrlikteri arasynda 10 qujat qabyldandy. Olardyń qatarynda Samarqand qalasynda RF Bas konsýldyǵyn qurý, ýákiletti ekonomıkalyq operator ınstıtýttaryn ózara taný, «Agroekspress» jedel temirjol tasymaldary jobasyn iske asyrý, syrtqy ister mınıstrlikteri arasyndaǵy 2024-2025 jyldarǵa arnalǵan yntymaqtastyq baǵdarlamasy, sondaı-aq kólik, ǵylym, bilim jáne mádenıet salalaryndaǵy yntymaqtastyq jóninde birqatar qujat bar.
Buǵan deıin Ózbekstan Respýblıkasynyń prezıdenti Shavkat Mırzıeev 5 qazanda Vladımır Pýtınniń shaqyrýymen Reseı Federatsııasyna resmı saparmen barǵany habarlanǵan bolatyn. Qazan qalasynda Shavkat Mırzıeev Tatarstan basshysy Rýstam Mınnıhanovpen kelissózder júrgizdi.
Mádıbek Jánibekov