Ózbekstan men Kýba EAEO janyndaǵy baqylaýshy-memleket mártebesine ıe boldy

NUR-SULTAN. QazAqparat – Joǵary Eýrazııalyq ekonomıkalyq keńestiń otyrysynda ekonomıkalyq odaqqa múshe memleketterdiń bir aýyzdan bergen daýysy boıynsha Ózbekstan men Kýba EAEO janyndaǵy baqylaýshy-memleket mártebesine ıe boldy, dep habarlaıdy QazAqparat tilshisi.

Joǵary Eýrazııalyq ekonomıkalyq keńestiń otyrysynyń sońynda keńes tóraǵasy, Belarýs prezıdenti Aleksandr Lýkashenko Ózbekstan men Kýbany EAEO janyndaǵy baqylaýshy-memleket quramyna kirgizý týraly suraqty kún tártibine qoıdy. Ekonomıkalyq odaqqa múshe memleketterdiń eshqaısysy bul sheshimge qarsylyq bildirgen joq.

«Sizderdiń attaryńyzdan, EAEO múshe memleketterdiń basshylarynyń atynan Kýba Respýblıkasy men Ózbekstan Respýblıkasynyń prezıdentterin quttyqtaýǵa ruqsat etińizder. Osynaý mártebe bizdiń ekonomıkalyq odaqpen yntymaqtastyqty nyǵaıtýǵa jol ashyp, saýda-ekonomıkalyq qarym-qatynasty bekemdete túsýge múmkindik berer degen senimdemiz», - dedi Aleksandr Lýkashenko.