Ózbekstan men Qytaı arasyndaǵy taýar aınalymy 50 paıyzǵa ósti

<p>TAShKENT. KAZINFORM &ndash; Ózbekstan prezıdenti Shavkat Mırzıeevtiń Qytaıǵa jasaǵan memlekettik sapary QHR Memlekettik keńesiniń premeri Lı Tsıanmen kezdesýden bastady, dep habarlaıdy Kazinform agenttiginiń menshikti tilshisi Álıhan Asqar.&nbsp;</p>

Ózbekstan basshysynyń baspasóz qyzmetinen málimdegendeı, kezdesý barysynda saýda-ekonomıkalyq saladaǵy ózara is-qımyldy odan ári nyǵaıtý máseleleri qaraldy. Bul rette ózbek-qytaı qatynastary barlyq sala men baǵyttarda buryn-sońdy bolmaǵan deńgeıge jetkeni atap ótildi.

«Ótken jyly taýar aınalymy 50 paıyzǵa ósip, 14 mlrd dollarǵa jetti. Bul kórsetkishti 20 mlrd dollarǵa deıin arttyrý múmkindigi qarastyrylyp otyr. Ózbekstan ekonomıkasyna baǵyttalǵan qytaılyq ınvestıtsııalardyń jalpy kólemi 14 mlrd dollardan asty», - dep málimdedi prezıdenttiń baspasóz qyzmetinen.

Shavkat Mırzıeev pen Lı Tsıan ınfraqurylymdy jańǵyrtý, ónerkásiptik kooperatsııany keńeıtý, aýyl sharýashylyǵyndaǵy tehnologııalar transferi jáne «jasyl» energetıkany damytý boıynsha yntymaqtastyqtyń jekelegen baǵdarlamalaryn daıyndaýdy talqylady.

Sonymen qatar Qytaıdyń qarjy ınstıtýttarymen ózara is-qımyl perspektıvalary jáne qytaılyq kompanııalardyń Ózbekstandaǵy jekeshelendirý protsesterine qatysýy qaraldy.

Eske salaıyq, 23-25 qańtar aralǵynda Ózbekstan prezıdenti Shavkat Mırzıeev Qytaıǵa memlekettik saparmen baratynyn jazyp edik.