Ózbekstan men Qazaqstan arasynda jańa qala paıda bolýy múmkin - QR Prezıdenti
«Shavkat Mırzıeev Ózbekstannyń basshylyǵyna kelgennen beri jaǵdaı múldem ózgerdi. El halqynyń sany 33 mıllıondy qurady. Bul, bizdiń aramyzdaǵy (Ortalyq Azııadaǵy) eń iri memleket bolyp sanalady. Osy elmen qarym-qatynasty tereńdetý biz úshin qajet. Kórshimen baılanysty nyǵaıtpaı qalaı ómir súrýge bolady?! Ekonomıkalyq turǵyda paıdaly, alysqa tasymaldaýdyń qajeti joq. 1 mlrd AQSh dollarǵa jetpeı júrgen saýda-sattyǵymyz bıyl 3 mıllıard bolady», - dedi Elbasy.
Osy oraıda Memleket basshysy Ózbekstan Respýblıkasynyń Prezıdentimen telefon arqyly sóleskenin eske salyp, eki el arasyndaǵy yntymaqtastyq máseleleri talqylanǵanyn atap ótti.
«Bıyl saýda kólemi 42 paıyzǵa artty. Biz 5 mıllıard AQSh dollaryna jetkizý maqsatyn qoıyp otyrmyz», - dedi N. Nazarbaev.
Prezıdenttiń sózine qaraǵanda, eki el arasynda kóptegen salalardaǵy máseleler boıynsha ýaǵdalastyqqa qol jetkizý úshin múmkindik paıda boldy. Qazirgi ýaqytta barlyq kólik túrlerimen ózara saparlaý úshin ınfraqurylym jasalyp jatyr.
«Qazaqstan men Qytaı arasynda «Qorǵas» atty úlken keshen salynyp jatqanyn bilesizder. Sondaı keshen Ózbekstan men Qazaqstan arasynda da bolady dep sanaımyn. Eki jaqtan óndiris jasap, ol jerde jańa qala paıda bolýy múmkin», - dedi Memleket basshysy.