Ózbekstan men Gazprom arasyndaǵy kelisimniń mán-jaıy belgili boldy

TAShKENT. QazAqparat - Ózbekstannyń Energetıka mınıstrligi Ózbekstan men «Gazprom» arasyndaǵy kelisimniń jaı-japsaryn túsindirdi, dep habarlaıdy QazAqparat tilshisi.

Ózbekstan Energetıka mınıstrliginiń málimetinshe, qol qoıylǵan «Jol kartasy» baǵdarlamasyna sáıkes taraptar arasynda Qazaqstan men Ózbekstan aýmaǵy arqyly ótetin «Ortalyq Azııa– Ortalyq» gaz qubyry arqyly gaz tranzıtin júzege asyrý úshin tehnıkalyq is-sharalar kelisilgen.

Tehnıkalyq jumystar aıaqtalǵannan keıin tabıǵı gazdy jetkizýdiń negizgi sharttary talqylanady.

«Kelissóz ben «Jol kartasy» Ózbekstan Respýblıkasynyń qoldanystaǵy gaz tasymaldaý júıesine menshik quqyǵyn tolyq saqtaı otyryp, tabıǵı gazdy ishki naryqqa qajetti kólemde jetkizýge baǵyttalǵanyn atap ótken jón. Bul jaǵdaıda gaz tasymaldaý júıesine de, elimizdiń egemendigimizge de qaýip joq», - dep atap ótti Ózbekstan Energetıka mınıstrligi.

Vedomstvo aldaǵy ýaqytta bul baǵyttaǵy búkil jumys Ózbekstannyń ulttyq múddesi tolyq qorǵalǵan jaǵdaıda júrgizilip, nátıje turaqty túrde jurtshylyq nazaryna usynylyp otyratynyn jetkizdi.

Buǵan deıin habarlaǵanymyzdaı, 24 qańtarda Ózbekstan men «Gazprom» gaz salasyndaǵy yntymaqtastyq jol kartasyna qol qoıdy.