Ózbekstan men BAÁ strategııalyq áriptestik týraly deklaratsııaǵa qol qoıdy

<p>TAShKENT. KAZINFORM &ndash; Ózbekstan basshysy Shavkat Mırzıeev Abý-Dabıge jasaǵan resmı sapary aıasynda BAÁ prezıdenti sheıh Muhammed ben Zaıd ál-Nahaıanmen shaǵyn quramda kelissóz júrgizdi, dep habarlaıdy Kazinform agenttiginiń menshikti tilshisi.</p>

Kelissóz barysynda taraptar Ózbekstan men Birikken Arab Ámirlikteri arasyndaǵy dostyq qarym-qatynas pen san salaly yntymaqtastyqty odan ári nyǵaıtý múmkindikterin talqylady.

Shavkat Mırzıeev pen sheıh Muhammed ben Zaıd ál-Nahaıan jasandy ıntellekt, tsıfrlandyrý, «jasyl» energetıka, qala qurylysy, ınfraqurylym men týrızm salalaryndaǵy baılanysty tereńdete túsýge nıet bildirdi. Tıisinshe, atalǵan ár sektordy ilgeriletý boıynsha jumys toptary qurylady.

Sonymen birge, taraptar 2025-2027 jyldardy «Ózbekstan men BAÁ arasyndaǵy ekonomıkalyq áriptestiktiń jańa dáýiri» dep jarııalaý usynysyna qoldaý bildirdi. Onyń aıasynda 2030 jylǵa qaraı ózara alys-beris kólemin 10 ese arttyryp, ınvestıtsııa portfelin $50 mlrd jetkizýge baǵyttalǵan jospar qabyldanbaq.

Qos el basshylarynyń kelissózi nátıjesinde Ózbekstan men BAÁ arasynda strategııalyq áriptestik ornatý týraly deklaratsııaǵa qol qoıyldy.

Eske salaıyq, buǵan deıin Ózbekstan men BAÁ Tashkentte derekterdi óńdeý ortalyǵyn qurýǵa nıetti ekenin jazyp edik.