Ózbekstan quramasyndaǵy qazaq jigiti medalǵa ilikti

ASTANA. QazAqparat – Tashkent qalasynda erler arasynda ótip jatqan bokstan álem chempıonatynda ózbekstandyq Rýslan Abdýllaev jartylaı fınalǵa shyqty, dep habarlaıdy QazAqparat tilshisi.

Qazaq jigiti 63,5 kelige deıingi salmaqta frantsııalyq Lýnes Amraýımen sheberlik baıqasty.

Jekpe-jek qorytyndysynda tóreshilerdiń tórteýi jeńisti Rýslan Abdýllaevqa berdi.

Osylaısha, jartylaı fınalǵa ótken Rýslan Abdýllaev keminde qola medal alady.

Ol fınalǵa shyǵý úshin olımpıada men álem chempıonatynyń qola júldegeri, armenııalyq Oganes Bachkovpen talasady.

Budan úsh-tórt jyl buryn Rýslan Abdýllaev Qazaqstanǵa kelip, el quramasyna iligýdi maqsat etkenimen, ol oıy oryndalmaı, Ózbekstanǵa qaıtyp ketken edi.

Osy chempıonatta Ózbekstannan Hasanboı Dýsmatov (51 kg) pen Abdýmalık Halokov (57 kg) jartylaı fınalǵa ótti.

Eske sala keteıik, budan buryn Qytaı quramasyndaǵy qazaq boksshysy álem chempıonatynda qarsylasyn nokaýtpen utqanyn jazǵan edik.

Qazaqstan quramasynan kapıtan Aslanbek Shymbergenov pen Dýlat Bekbaýov shırek fınalǵa ótti, al Nurqanat Raıys pen Serik Temirjanov shırek fınalǵa shyǵa almady.