Ózbekstan Qazaqstannyń qurylys salasyndaǵy tájirıbesin úırenýdi josparlap otyr
QR Indýstrııa jáne ınfraqurylymdyq damý mınıstrligine qarasty «Qazaq qurylys jáne sáýlet ǵylymı-zertteý jáne jobalaý ınstıtýty» AQ («QazQSǴZI» AQ) men Ózbekstannyń Qurylys mınıstrligi janyndaǵy Qurylystaǵy tehnıkalyq normalaý ortalyǵy yntymaqtastyq týraly memorandýmǵa qol qoıdy.
Taraptar birqatar birlesken jobalardy kózdeıtin ózara tıimdi yntymaqtastyq jóninde ýaǵdalasty.
Atap aıtqanda, Qazaqstan men Ózbekstannyń ǵalymdary men mamandaryn tarta otyryp, seısmıkaǵa tózimdi qurylys salasyndaǵy ǵylymı-zertteý jumystaryn negizdeý jáne oryndaý úshin birlesken ýaqytsha ǵylymı ujymdar qurý josparlanýda.
Qazaqstandyq mamandardyń Ózbekstanda tabıǵı vıbrodınamıkalyq synaqtar júrgizýi týraly ýaǵdalastyqqa qol jetkizildi.
Sondaı-aq birlesken bilim berý baǵdarlamalaryn ázirleý jáne iske asyrý, jer silkinisine tózimdi ǵımarattar men qurylystardy salý salasynda ǵylymı jáne ǵylymı-ádistemelik konferentsııalar, semınarlar, sımpozıýmdar, «dóńgelek ústelder», kezdesýler men kórmeler ótkizý, tájirıbe jáne aqparat almasý kózdelgen.
Yntymaqtastyq sheńberinde Ózbekstanda seısmıkalyq oqshaýlaý tehnologııalaryn jáne ǵımarattar men qurylystardy seısmıkalyq qorǵaýdyń basqa da ádisterin engizý jáne odan ári damytý boljanyp otyr. Sondaı-aq, Ózbekstan Qazaqstannyń baǵa belgileý, aqparattyq modeldeý jáne qurylys salasyndaǵy halyqaralyq normalardy engizý salasyndaǵy tájirıbesine súıenedi.
«QazQSǴZI ınstıtýtynyń seısmıkaǵa tózimdi qurylys, baǵa belgileý jáne aqparattyq modeldeý salasynda úlken tájirıbesi bar. 2019 jyly ınstıtýtqa TMD elderiniń seısmıkaǵa tózimdi qurylysy salasyndaǵy bazalyq uıym mártebesi berildi. QazQSǴZI bazasynda TMD elderiniń qurylysynda aqparattyq modeldeý tehnologııasy salasyndaǵy normatıvtik-tehnıkalyq bazany damytý jónindegi komıssııa jumys isteıdi. Biz QazQSǴZI - dyń qurylystaǵy kásibı tájirıbesi Ózbekstandaǵy áriptesterimiz tarapynan tabysty qoldanylyp, jetildiriletinine senimdimiz», - deıdi «QazQSǴZI»AQ Bas dırektory Begman Kólbaev.
Esterińizge sala keteıik, 2018 jyly «QazQSǴZI» ınstıtýtynyń mamandary Tashkent qalasyndaǵy 9 qabatty úıdiń biregeı vıbrodınamıkalyq synaǵyn ótkizip, keıin ol «Ózbekstandaǵy qoljetimdi turǵyn úı» baǵdarlamasyna úlgilik joba retinde engizilgen edi.