Ózbekstan Qazaqstannyń kólik naryǵyna dendep enbek

ASTANA. QazAqparat - «Allıýr» kompanııalar toby» qazaqstandyq kompanııasy men Ózbekstannyń «Ýzavtosanoat» aktsıonerlik qoǵamy ózara yntymaqtastyq týraly memorandým rásimdedi. Atalǵan qujatqa eki kompanııa basshylarynyń orynbasarlary - ıÝrıı Afanasev pen Rýstam Ýsmanov qol qoıǵan, dep xabarlaıdy QazAqparat tilshisi Podrobno.uz  saıtyna silteme jasap. 

Memorandým aıasynda elimizdegi avtomobıl jasaý salasyndaǵy kásiporyndardyń texnıkalyq bazasyn jańartý josparlanǵan. «Ýzavtosanoattyń» ónimderin «AllurGroup» kompanııasynyń óndiris oshaqtaryna jetkizý sharalary da qarastyrylyp otyr. Qujatta ózara saýda, taýar almasý, eksport-ımporttyq operatsııalar, aqparat almasý men qyzmet kórsetý, tipti birlesken jobalardy iske asyrý jospary bar.

«Memorandýmǵa sáıkes, taraptar Qazaqstan naryǵy úshin shyǵarylatyn ónimderdiń modeldik qataryn keńeıtýdi de qarastyrýda. Áriptes kompanııalar naryqtyń suranysyna qaraı ónim óndirý kólemin arttyratyn bolady», - delingen resmı xabarlamada.

Buǵan deıin "AllurGroup" kompanııasy Ózbekstannyń taǵy bir kólik óndirýshisi - "GM Uzbekistan"-men kelisim jasasyp, Qostanaıda "Ravon Nexia R3" kóligin shyǵarýdy qolǵa alǵanyn jarııalaǵan edi. 

Aıta keteıik, «Allıýr kompanııalar toby» AQ - Qazaqstandaǵy iri kólik óndirýshi «SaryarkaAvtoProm» JShS-niń,  aýyl sharýashylyǵy texnıkasyn shyǵaratyn «Agromashholdıng» AQ-nyń aktsıoneri. Atalǵan kompanııalar SsangYong, Peugeot, Iveco, JAC, Hyundai, Ravon, Niva Chevrolet, Suzuki, Mitsubishi, Ravon men Ford-tyń Qazaqstandaǵy resmı dıstrıbıýtory bolyp tabylady.