Ózbekstan Qazaqstannyń memlekettik organdardyń tıimdiligin baǵalaý júıesine qyzyǵýshylyq tanytty

<p>ASTANA. KAZINFORM &ndash; Búgin Memlekettik qyzmet isteri agenttiginiń tóraǵasy Darhan Jazyqbaı Ózbekstan Respýblıkasynyń Prezıdenti janyndaǵy Strategııalyq reformalar agenttiginiń dırektory Bahodır Rahmatovpen kezdesti.</p>

Kezdesý barysynda memlekettik qyzmet salasyn damytý boıynsha tájirıbe almasýdyń mańyzdylyǵy talqylanyp, Qazaqstannyń memlekettik qyzmet salasyndaǵy tájirıbesi Ózbekstannyń osy salaǵa jaýapty ýákiletti memlekettik organyn qurý jáne zańnamalyq aktilerdi qabyldaý kezinde jiti zerdelengeni atap ótildi. 

Aıta ketý kerek, bıylǵy jyldyń qyrkúıek aıynda Ózbekstannyń Memlekettik qyzmetti damytý agenttiginiń ókilderi Memlekettik basqarý akademııasynda memlekettik qyzmettegi assesment boıynsha oqytýdan ótken bolatyn.

Darhan Jazyqbaı ózbek áriptesterin Memleket basshysynyń «Adam memleket úshin emes, memleket adam úshin» qaǵıdasy aıasynda iske asyrylyp jatqan memlekettik qyzmet júıesin jańǵyrtý sharalarymen tanystyrdy. Ol memlekettik apparatta servıstik jáne adamǵa baǵdarlaný qaǵıdattaryn ilgeriletý, memlekettik qyzmettiń gıbrıdtik modelin qalyptastyrý, qyzmetshilerdi kásibılendirý jumystaryna toqtaldy.

Ózbekstan tarapy elimizde memlekettik qyzmetti damytýdyń 2024-2029 jyldarǵa arnalǵan tujyrymdamasyna, memlekettik organdardyń tıimdiligin baǵalaý júıesine, memlekettik qyzmetshilerdiń ıkemdi jumys kestesine qyzyǵýshylyq tanytyp, tájirıbe almasýǵa daıyn ekendigin bildirdi. 

«MQІA tóraǵasy memlekettik kyzmetke kadrlardy tsıfrlyq formatta irikteýdi júzege asyratyn «eQyzmet» júıesiniń múmkindikteri jáne memlekettik qyzmetshilerdiń biliktiligin úzdiksiz arttyrý sharalary týraly aıtty. Kezdesý sońynda taraptar aldaǵy ýaqytta tyǵyz baılanysta jumystar atqarýǵa nıetti ekendikterin bildirdi», - dep atap ótedi agenttiktiń baspasóz qyzmetinen.