Ózbekstan Gaza sektorynyń turǵyndaryna kómek retinde $1,5 mln bóledi – Shavkat Mırzıeev

<p>Ózbekstan Gaza sektorynyń turǵyndaryna kómek kórsetý maqsatynda Birikken Ulttar Uıymynyń Taıaý Shyǵys agenttigine 1,5 mıllıon dollar bóledi. Bul týraly Ózbekstan prezıdenti Shavkat Mırzıeev kúz-qys maýsymdaryna energetıkalyq júıeni daıyndaý máseleleri talqylanǵan keńeste málim etti, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttiginiń menshikti tilshisi.&nbsp;</p>

Ózbekstan basshysynyń baspasóz qyzmetinen málim etkendeı, Shavkat Mırzıeev keńestiń basynda búkil álemdi alańdatqan máselege toqtaldy.

«Ózderińiz biletindeı, Izraıl áskeri men HAMAS qozǵalysy arasyndaǵy qarýly qaqtyǵystar gýmanıtarlyq daǵdarysty eseleı tústi. Sondaı-aq beıbit, jazyqsyz halyq qurban bolyp jatyr. Balalar men áıelder qaza taýyp, adamdar panasynan aıyryldy, týǵan úılerin tastap ketýge májbúr bolyp jatyr. Biz Palestına men Izraıl taraptarynan qaza tapqandardyń otbasylaryna kóńil aıtamyz. Men Gaza sektorynyń turǵyndaryna qoldan kelgenshe kómek kórsetý úshin Birikken Ulttar Uıymynyń Taıaý Shyǵys agenttigine 1 mıllıon 500 myń dollar bólý týraly sheshim qabyldadym. Biz Palestına halqynyń BUU Bas Assambleıasy men Qaýipsizdik Keńesiniń buryn qabyldanǵan qararlaryna sáıkes, onyń táýelsiz memleket qurý quqyǵyn qoldaımyz», - dedi Ózbekstan prezıdenti.

Shavkat Mırzıeev eki tarapty qaqtyǵys qımyldaryn toqtatýǵa jáne janjaldy beıbit jolmen sheshýge shaqyrdy.